ඊයේ (ජූනි 5) සවස කටුනායක සිට සිංගප්පූරුව බලා පිටත්වූ UL-306 දරන ශ්‍රී ලංකන් ගුවන් යානය කාර්මික දෝෂයකට ලක්වීම හේතුවෙන් ඉන්දුනීසියාවේ මෙඩාන් ගුවන් තොටුපොළ වෙත හදිසියේ ගොඩබස්සවා තිබෙනවා.

ඉන්දුනීසියානු තාක්ෂණික කණ්ඩායමක් විසින් ගුවන් යානය පරීක්ෂා කිරීමෙන් අනතුරුව, අදාළ දෝෂය නිවැරදි කිරීමට සැලකිය යුතු කාලයක් ගතවන බව දැනුම් දී තිබෙනවා. ඒ හේතුවෙන් ගුවන් මගීන් හෝටල් කාමර වෙත යොමු කිරීමට තීරණය කර ඇති බව සඳහන් වුවත්, ඉන්දුනීසියානු බලධාරීන් මුලින් හෝටල් කාමර තුළ රැඳවීමට අවස්ථාව ලබා නොදීමත් සමඟ යම් අර්බුදකාරී තත්ත්වයක් මතුවී තිබෙනවා. කෙසේ වෙතත්, එරට ශ්‍රී ලංකා තානාපතිවරයාගේ මැදිහත්වීමෙන් මෙම ගැටලුව නිරාකරණය කර ගැනීමට හැකි වූ බව වාර්තා වේ.

දෝෂයට ලක්වූ ගුවන් යානයේ මගීන් යළි ශ්‍රී ලංකාවට ගෙන්වා ගැනීම සඳහා අද (ජූනි 6) දහවල් 1.45ට තවත් ගුවන් යානයක් මෙඩාන් බලා පිටත්ව යාමට නියමිතයි. මෙම අනපේක්ෂිත සිදුවීම හේතුවෙන් ගුවන් මගීන්ට සිදුවූ අපහසුතාවය පිළිබඳව ශ්‍රී ලංකන් ගුවන් සේවය කනගාටුව පළ කරනවා.