ගාල්ල – කොටුව ඕලන්ද රෝහල් ගොඩනැගිල්ල පිටුපස ඇති ගල් බැම්ම මතින් මුහුදට ගසාගෙන ගිය තරුණ යුවළක් බේරා ගැනීමට අසල සිටි පිරිසක් සමත්ව තිබෙනවා.
මෙම සිදුවීම ඊයේ (සැප්තැම්බර් 22) සවස සිදුවී ඇති අතර, එය අසල සිටි පුද්ගලයෙකු විසින් වීඩියෝ ගත කර තිබෙනවා.
ප්රදේශවාසීන් පවසන පරිදි, මෙම යුවළ පෙම් සුව විඳීම සඳහා ගල් බැම්ම මත ඇති කුටියට පැමිණ ඇති අතර, මුහුද එකවරම රළු වීමත් සමඟ ඔවුන් දෙදෙනා මුහුදට ගසාගෙන ගොස් ඇත.
මෙම අවස්ථාවේදී ඕලන්ද ගොඩනැඟිල්ලේ ආරක්ෂාව හා පරිපාලන භාර නිලධාරී ගාමිණී මහතා වහාම මුහුදට පැන ඔවුන් බේරා ගැනීමට උත්සාහ කර තිබෙනවා. පසුව, අවට සංචාරක ආපනශාලාවල සිටි තරුණ පිරිසක්ද පැමිණ දැඩි පරිශ්රමයක් දරා මෙම යුවළ බේරාගෙන ගාල්ල ජාතික රෝහලට ඇතුළත් කර තිබෙනවා.
අනතුරට ලක්වූ තරුණිය සහ තරුණයා අහංගම සහ ලුණුමෝදර ප්රදේශවල පදිංචිකරුවන් බව පොලීසිය පවසයි. රෝහල් ආරංචි මාර්ග සඳහන් කරන්නේ, තරුණිය මේ වනවිට දැඩි සත්කාර ඒකකයේ ප්රතිකාර ලබන අතර, තරුණයා හදිසි ප්රතිකාර ඒකකයේ ප්රතිකාර ලබන බවයි.
මෙම සිදුවීම, මුහුදු රළු වන අවස්ථාවන්වලදී වෙරළ තීරයන්හිදී වඩාත් ප්රවේශම් විය යුතු බවට නැවතත් අනතුරු අඟවනවා.
