ත්රිකුණාමලය ශ්රී සම්බුද්ධ ජයන්ති බෝධිරාජ විහාරයේ කොටසක් කඩා ඉවත් කරන ලෙස වෙරළ සංරක්ෂණ දෙපාර්තමේන්තුව ලබා දී ඇති නියෝගයට එරෙහිව ගොනුකළ රිට් පෙත්සම ලබන අප්රේල් මස 28 වනදා යළි කැඳවීමට අභියාචනාධිකරණය අද (20) නියම කළේය.
මෙම පෙත්සම ඉදිරිපත් කර තිබුණේ විහාරාධිපති පූජ්ය ත්රිකුණාමලයේ කල්යාණ වංශ තිස්ස හිමියන් විසිනි.
ධම්මික ගනේපොල සහ ආදිත්ය පටබැඳිගේ යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ මෙම පෙත්සම අද සලකා බලන ලදී.
අදාළ පාර්ශවයන් අතර මෙම ගැටලුව සමථයකට පත් කර ගැනීමට ඇති හැකියාව පිළිබඳව කරුණු සලකා බැලීම සඳහා විනිසුරු මඩුල්ල තීරණය කළේය. ඒ අනුව, වැඩිදුර කරුණු විමසීම සඳහා පෙත්සම අප්රේල් 28 වනදා දක්වා කල් තැබීමට නියෝග කෙරුණි.
වෙරළ සංරක්ෂණ දෙපාර්තමේන්තුව විසින් විහාරස්ථානයේ යම් කොටසක් නීතිවිරෝධී ඉදිකිරීමක් ලෙස හඳුනාගෙන එය ඉවත් කරන ලෙස මීට පෙර නියෝග කර තිබුණි. එම නියෝගය ක්රියාත්මක කිරීම වැළැක්වීමේ ආඥාවක් නිකුත් කරන ලෙස ඉල්ලමින් විහාරාධිපති හිමියන් මෙම නෛතික ක්රියාමාර්ගයට අවතීර්ණ වී ඇත.
