නීත්‍යානුකූල අවසරයකින් තොරව විශාල ඩීසල් තොගයක් සිය සන්තකයේ තබාගෙන අලෙවි කිරීමේ චෝදනාව මත සේරුනුවර ප්‍රදේශයේ පදිංචි පුද්ගලයෙකු පොලිස් අත්අඩංගුවට පත්ව තිබේ. කන්තලේ කොට්ඨාස අපරාධ විමර්ශන කාර්යාංශයේ නිලධාරීන්ට ලැබුණු විශේෂ තොරතුරකට අනුව සිදුකළ වැටලීමකදී මෙම ජාවාරම අනාවරණය කර ගැනීමට හැකි වී ඇත.

අත්අඩංගුවට ගන්නා අවස්ථාවේදී සැකකරු සන්තකයේ තිබී ඩීසල් ලීටර් 1,820ක ප්‍රමාණයක් පොලිස් භාරයට ගෙන තිබේ. මෙලෙස අත්අඩංගුවට පත්ව ඇත්තේ සේරුනුවර ප්‍රදේශයේම පදිංචි 41 හැවිරිදි වියේ පසු වන පුද්ගලයෙකි.

පවතින ඉන්ධන අර්බුදය සහ සීමාවන් හමුවේ මෙලෙස අනවසරයෙන් ඉන්ධන රැස්කර තබා ගැනීම සහ වැඩි මිලට අලෙවි කිරීම සම්බන්ධයෙන් පොලීසිය දැඩි අවධානයෙන් පසුවෙයි. අත්අඩංගුවට ගත් සැකකරු සහ ඉන්ධන තොගය ඉදිරි නීතිමය කටයුතු සඳහා සේරුනුවර පොලීසිය වෙත භාර දී ඇත.

සේරුනුවර පොලීසිය සිද්ධිය සම්බන්ධයෙන් වැඩිදුර විමර්ශන මෙහෙයවන අතර, සැකකරු අධිකරණය වෙත ඉදිරිපත් කිරීමට නියමිතය.