2022 මැයි 09 වනදා නිට්ටඹුව නගරයේදී පොළොන්නරුව දිස්ත්‍රික් පාර්ලිමේන්තු මන්ත්‍රී අමරකීර්ති අතුකෝරළ මහතා සහ ඔහුගේ ආරක්ෂක නිලධාරියා අමානුෂික ලෙස පහරදී ඝාතනය කිරීමේ සිද්ධියට අදාළ නඩු තීන්දුව අද (11) ප්‍රකාශයට පත් කිරීමට නියමිතය.

ගම්පහ මහාධිකරණ ත්‍රිපුද්ගල විනිසුරු මඬුල්ල හමුවේ අද පෙරවරුවේදී මෙම තීන්දුව ප්‍රකාශයට පත් කෙරෙනු ඇත.

සහන් මාපා බණ්ඩාර, රශ්මි සිංගප්පුලි සහ රසන්ත ගොඩවෙල යන මහාධිකරණ විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ලක් විසින් මෙම දීර්ඝ නඩු විභාගය මෙහෙයවනු ලැබීය.

මුලින් මෙම නඩුවේ තීන්දුව ජනවාරි 14 වනදා ප්‍රකාශයට පත් කිරීමට නියමිතව තිබුණද, එදින කරුණු සලකා බැලූ විනිසුරු මඬුල්ල තීන්දුව ප්‍රකාශ කිරීම අද (පෙබරවාරි 11) දක්වා කල් තැබීමට පියවර ගත්තේය.

2022 මැයි 09 වන දින, දිවයින පුරා පැවති අරගලකාරී උණුසුම් වාතාවරණය මධ්‍යයේ නිට්ටඹුව නගරයේදී මෙම ඝාතනය සිදුවිය.

නිට්ටඹුව හරහා ගමන් කරමින් සිටි මන්ත්‍රීවරයා සහ ඔහුගේ ආරක්ෂක නිලධාරියා ප්‍රකෝපකාරී පිරිසකගේ වටලෑමට ලක්වූ අතර පසුව එල්ල වූ දරුණු ප්‍රහාර හමුවේ ඔවුන් ජීවිතක්ෂයට පත් විය.

මෙම සිද්ධිය සම්බන්ධයෙන් පුද්ගලයන් 41 දෙනෙකුට එරෙහිව නීතිපතිවරයා විසින් අධිචෝදනා ගොනු කර තිබුණි.

දීර්ඝ කාලයක් පුරා විභාග වූ මෙම නඩුව, මෙරට දේශපාලන සහ අධිකරණ ඉතිහාසයේ සුවිශේෂී අවධානයක් දිනාගත් නඩුකරයක් ලෙස සැලකේ.