ප්‍රබල සංවිධානාත්මක අපරාධකරුවෙකු සහ මත්ද්‍රව්‍ය ජාවාරම්කරුවෙකු වන ‘සමන් කොල්ලා’ නැමැත්තාගේ මත්කුඩු ජාවාරමට සෘජුවම සම්බන්ධ 15 හැවිරිදි පාසල් සිසුවෙකු අත්අඩංගුවට ගැනීමට අම්බලන්ගොඩ පොලිසිය සමත්ව තිබේ.

ඊයේ (15) රාත්‍රියේ අම්බලන්ගොඩ, පැරට් හංදිය ආසන්නයේදී මෙම සැකකාර සිසුවා පිළිබඳව ඇති වූ සැකයක් මත පොලිස් නිලධාරීන් විසින් ඔහුව පරික්ෂාවට ලක් කර ඇත. එහිදී ඔහු සන්තකයේ තිබී හෙරොයින් මත්ද්‍රව්‍ය මිලිග්‍රෑම් 10,600කට (ග්‍රෑම් 10යි මිලිග්‍රෑම් 600ක්) ආසන්න ප්‍රමාණයක් සොයාගත් බව පොලිසිය පවසයි.

පොලිස් ප්‍රශ්න කිරීම්වලදී අනාවරණය වී ඇත්තේ, දැනට විදේශගතව හෝ සැඟව සිටින ‘සමන් කොල්ලා’ නමැති ජාවාරම්කරුගේ උපදෙස් හා මෙහෙයවීම මත මෙම සිසුවා ඊෂි කෑෂ් (Easy Cash) ක්‍රමය ඔස්සේ දීර්ඝ කාලයක සිට මත්ද්‍රව්‍ය ජාවාරම සිදුකරගෙන ගොස් ඇති බවයි. වයස්ගත නොලත් පාසල් සිසුන් මෙලෙස මත්ද්‍රව්‍ය ජාලයන්ට හසුකර ගැනීම පිළිබඳව පොලිසිය වැඩිදුර විමර්ශන පවත්වයි.