ශ්රී ලංකාව තුළ දේශීය හෝ විදේශීය කිසිදු පුද්ගලයෙකුට නිසි බලපත්රයකින් තොරව ඩ්රෝන යානා (Drones) පියාසර කිරීම සපුරා තහනම් බව ශ්රී ලංකා ගුවන් හමුදාව නිවේදනය කරයි. ජාතික ආරක්ෂාව තහවුරු කිරීමේ අරමුණින් මෙම පියවර ගෙන ඇති අතර, මේ වන විටත් අධි ආරක්ෂිත කලාප තුළ අනවසරයෙන් ඩ්රෝන ක්රියාත්මක කළ පුද්ගලයන්ට එරෙහිව දැඩි නීතිමය ක්රියාමාර්ග ගෙන ඇති බව ගුවන් හමුදාව සිහිපත් කර සිටියි.
ගුවන් හමුදාව අවධාරණය කරන්නේ ශ්රී ලංකා ගුවන් සීමාව තුළ ඩ්රෝන යානා භාවිත කිරීමට අපේක්ෂා කරන සියලු දෙනා පවතින නීති සහ රෙගුලාසිවලට අනුකූලව කටයුතු කළ යුතු බවයි. ඒ අනුව, ඕනෑම පියාසර කරවීමකට පෙර සිවිල් ගුවන් සේවා අධිකාරිය සහ ගුවන් හමුදාව ඇතුළු අදාළ ආයතනවලින් නිසි අවසර ලබා ගැනීම අනිවාර්ය වේ.
මෙම දැනුම්වත් කිරීම හරහා අනවසර ඩ්රෝන භාවිතය හේතුවෙන් පැන නැගිය හැකි නීතිමය ගැටලු සහ අනපේක්ෂිත අපහසුතාවලින් මිදෙන ලෙස පරිශීලකයන්ට උපදෙස් දෙනු ලැබේ. ඩ්රෝන යානා පියාසර කරවීමට අදාළ නවතම මාර්ගෝපදේශ සහ අවසර ලබා ගැනීමේ ක්රියාවලිය පිළිබඳ වැඩිදුර තොරතුරු ගුවන් හමුදා වෙබ් අඩවිය හරහා ලබා ගත හැකිය.
