ඉන්දියාව සහ පාකිස්තානය අතර ඇති වූ සටන් විරාම එකඟතාවය අගයමින් ශ්‍රී ලංකා ජනාධිපති අනුර කුමාර දිසානායක මහතා සුබපැතුම් පණිවිඩයක් නිකුත් කර තිබෙනවා.
එම පණිවිඩයේ ජනාධිපතිතුමා පවසන්නේ මෙම තීරණය දෙරටේම අහිංසක ජීවිත බේරා ගැනීමට ගත් වැදගත් එකඟතාවයක් පමණක් නොව, ස්ථිරසාර සාමය සහ කලාපීය ස්ථාවරත්වය සඳහා තැබූ පළමු පියවර බවයි. විශාල විනාශයක් සිදුවීමට පෙර ඉන්දියාවේ සහ පාකිස්තානයේ නායකයින් ගැටලු විසඳා ගැනීමට ආයුධ වෙනුවට වචන භාවිතා කිරීමට තීරණය කිරීම ඔවුන්ගේ නුවණ සහ රාජ්‍ය තාන්ත්‍රික හැකියාව පෙන්නුම් කරන බවත් එහි සඳහන් වෙනවා.
ඉන්දියාවේ සහ පාකිස්තානයේ සමීපතම අසල්වැසියෙකු සහ මිතුරෙකු ලෙස ශ්‍රී ලංකාව බලාපොරොත්තු වන්නේ මෙම සටන් විරාම එකඟතාව දිගුකාලීන ගැටලු සාමකාමීව විසඳා ගැනීමට මඟ පෑදිය යුතු බවයි. දෙරටේ අඛණ්ඩ සාකච්ඡාවලට ශ්‍රී ලංකාවේ සහාය ලබා දෙන බවත්, කලාපීය සාමය මේ යුගයේම අත්කර ගැනීමට අවශ්‍ය ඕනෑම සහයෝගයක් ලබා දීමට සූදානම් බවත් ජනාධිපති අනුර කුමාර දිසානායක මහතා වැඩිදුරටත් ප්‍රකාශ කර තිබෙනවා.
