නුවරඑළිය – ගම්පොළ ප්‍රධාන මාර්ගයේ කොත්මලේ, ගැරඬි ඇල්ල ප්‍රදේශයේදී අද (02) අලුයම සිදු වූ දරුණු රිය අනතුරකින් පුද්ගලයින් පස් දෙනෙකු බරපතළ තුවාල ලබා තිබේ. එකම පවුලේ සිව් දෙනෙකු සහ වෙළඳ සහායකයෙකු ගමන් ගත් වෑන් රථයක් මාර්ගයෙන් ඉවතට පැන අඩි 70ක පමණ ප්‍රපාතයකට පෙරළීමෙන් මෙම අනතුර සිදුව ඇත.

අලුයම 1.00ට පමණ අනතුර සිදුව ඇති අතර, තුවාලකරුවන් මේ වන විට නුවරඑළිය දිස්ත්‍රික් මහ රෝහලේ දැඩි සත්කාර ඒකකයේ ප්‍රතිකාර ලබන බව කොත්මලේ පොලිස් ස්ථානාධිපති ඉන්දික ලලිත් මහතා තහවුරු කළේය.

යතුරුපැදි අනතුරකට ලක්ව රෝහල්ගත කර සිටි හිතවතෙකු බැලීමට ගොස් නැවත කොත්මලේ තවලන්තැන්න බලා ධාවනය වෙමින් තිබූ වෑන් රථයක් මෙලෙස අනතුරට පත්ව තිබේ. පොලිස් විමර්ශනවලට අනුව අනතුරට හේතු වී ඇත්තේ:

• වෑන් රථය ධාවනය කළ අයිතිකරුට රිය අසුන මතදීම නින්ද යාම.

• මීට පෙර නායයාමකට ලක්වූ සහ මාරක බස් රථ අනතුරක් සිදුවූ ස්ථානය ආසන්නයේදීම මෙම අනතුරත් සිදුවීම.

අනතුරින් පසු වෑන් රථයේ සිටි අයිතිකරුගේ පුත්‍රයා සුන්බුන් අතරින් ඉවතට පැමිණ අසල තිබූ ප්‍රධාන මාර්ගයට පිවිස තිබේ. පසුව එම අවස්ථාවේ මාර්ගයේ ගමන් ගත් කැබ් රථයක් නතර කරවාගෙන, ප්‍රපාතයේ සිරවී සිටි තම මව, පියා සහ අනෙක් පිරිස බේරාගැනීමට සහාය ඉල්ලා ඇත.

අනතුරුව වහා ක්‍රියාත්මක වූ කොත්මලේ පොලිස් නිලධාරීන් සහ ප්‍රදේශවාසීන් එක්ව දැඩි පරිශ්‍රමයක් යොදා තුවාලකරුවන් ප්‍රපාතයෙන් ගොඩගෙන රෝහල්ගත කිරීමට පියවර ගෙන තිබේ.