රුපියල් කෝටි 10කට අධික වීථි වටිනාකමකින් යුත් “කුෂ්” මත්ද්‍රව්‍ය තොගයක් මෙරටට ගෙන ඒමට උත්සාහ කළ ශ්‍රී ලාංකික තරුණයන් දෙදෙනෙකු අද (26) අලුයම කටුනායක ගුවන්තොටුපොළේදී රේගු මත්ද්‍රව්‍ය පාලන අංශයේ නිලධාරීන් විසින් අත්අඩංගුවට ගෙන තිබේ.

අද අලුයම 05.20ට ඉන්දියාවේ නවදිල්ලි නුවර සිට පැමිණි ගුවන් යානයකින් මෙරටට පැමිණි මොවුන්, ගුවන්තොටුපොළේ “හරිත මාවත” (Green Channel) ඔස්සේ පිටතට යාමට උත්සාහ කිරීමේදී රේගු නිලධාරීන්ගේ සැකයට බඳුන් වී ඇත. එහිදී ඔවුන් සතු වූ ගමන් මලු 04ක් පරීක්ෂා කිරීමේදී, ඒවායේ ව්‍යාජ පතුල් තුළ ඉතා සූක්ෂ්ම ලෙස අසුරා තිබූ කුෂ් මත්ද්‍රව්‍ය පැකට් 12ක් සොයා ගැනීමට හැකි විය.

රේගු පරීක්ෂණවලදී අනාවරණය වී ඇත්තේ මෙම මත්ද්‍රව්‍ය තොගයේ බර කිලෝග්‍රෑම් 10යි ග්‍රෑම් 476ක් වන අතර එහි මුළු වටිනාකම රුපියල් 104,760,000ක් (දස කෝටි හතළිස් හත්ලක්ෂ හැටදහසක්) බවයි. සැකකරුවන් විසින් මෙම මත්ද්‍රව්‍ය තොගය තායිලන්තයේ බැංකොක් නුවරින් මිලදී ගෙන පසුව ඉන්දියාව හරහා මෙරටට රැගෙන විත් තිබේ.

අත්අඩංගුවට ගත් සැකකරුවන් දෙදෙනා බගවන්තලාව ප්‍රදේශයේ පදිංචි 25 සහ 26 හැවිරිදි වියේ පසුවන්නන්ය. ඉන් එක් අයෙකු රෙදි අලෙවිසැලක සේවකයෙකු වන අතර අනෙක් පුද්ගලයා රියදුරෙකු ලෙස සේවය කරන්නෙකි.

ඉදිරි විමර්ශන කටයුතු සඳහා සැකකරුවන් සහ අත්අඩංගුවට ගත් මත්ද්‍රව්‍ය තොගය කටුනායක ගුවන්තොටුපොළ පොලිස් මත්ද්‍රව්‍ය කාර්යාංශය වෙත භාර දී ඇත.