රට තුළ පවතින ඉන්ධන අවශ්‍යතාව සපුරාලීම වෙනුවෙන් තවත් දැවැන්ත ඉන්ධන නෞකා දෙකක් හෙට (10) සහ අනිද්දා (11) යන දිනවලදී මෙරටට ළඟා වීමට නියමිත බව ලංකා ඛනිජ තෙල් නීතිගත සංස්ථාව (CPC) නිල වශයෙන් තහවුරු කරයි.

ලංකා ඛනිජ තෙල් නීතිගත සංස්ථාවේ කළමනාකාර අධ්‍යක්ෂ මයුරු නෙත්තිකුමාරගේ මහතා ප්‍රකාශ කරන්නේ, දේශීය වෙළඳපොළේ පවතින ඉන්ධන ඉල්ලුමට සරිලන පරිදි ඉදිරි දින කිහිපය තුළ මෙම සියලුම ඉන්ධන තොග ගොඩබෑමේ කටයුතු කඩිනම් කිරීමට සැලසුම් කර ඇති බවයි.

ලංකා ඛනිජ තෙල් නීතිගත සංස්ථාවේ සැලසුම්වලට අනුව, ඔක්ටේන් 95 පෙට්‍රල් මෙට්‍රික් ටොන් 7,000ක් සහ ඔක්ටේන් 92 පෙට්‍රල් මෙට්‍රික් ටොන් 29,000ක් රැගත් පළමු නෞකාව හෙට (10) දිනයේදී දිවයිනට ළඟා වීමට නියමිතය.

මීට අමතරව, ඩීසල් මෙට්‍රික් ටොන් 28,000ක් පටවාගත් දෙවන ඉන්ධන නෞකාව සිංගප්පූරුවේ සිට අනිද්දා (11) දිනයේදී මෙරටට පැමිණීමට නියමිතව තිබේ. මෙම නෞකා දෙක මෙරටට ළඟා වූ වහාම සාම්ප්‍රදායික තත්ත්ව පරීක්ෂණවලින් අනතුරුව ඉන්ධන මුදා හැරීමේ කටයුතු ආරම්භ කෙරේ.

මේ අතර, ඩීසල් මෙට්‍රික් ටොන් 32,000ක් සහ ලංකා සුපිරි ඩීසල් මෙට්‍රික් ටොන් 7,200ක් රැගත් තවත් ඉන්ධන නෞකාවක් මේ වන විටත් කොළඹ වරායට සේන්දු වී, එහි අඩංගු ඉන්ධන භාණ්ඩ ගොඩබෑමේ කටයුතු සාර්ථකව සිදු කරමින් පවතියි.

ඒ අනුව, වරායේ දැනට ගොඩබෑම් සිදුකරන නෞකාවේ තොග සහ ඉදිරි දින දෙකේදී පැමිණීමට නියමිත නව නෞකා දෙකෙහි ඉන්ධන තොග ද සමඟින් ඉදිරි කාලසීමාව සඳහා රට තුළ කිසිදු ඉන්ධන හිඟයකින් තොරව පිරවුම්හල් වෙත අවශ්‍ය තොග අඛණ්ඩව නිකුත් කිරීමට හැකියාව පවතින බව ද ඛනිජ තෙල් සංස්ථාව වැඩිදුරටත් පෙන්වා දෙයි.