රත්නපුර ශික්ෂණ රෝහලේ අධ්‍යක්ෂවරයාගේ ක්‍රියාකලාපයට විරෝධය පළ කරමින් රජයේ වෛද්‍ය නිලධාරීන්ගේ සංගමය අද (සැප්තැම්බර් 02) දිනයේ සංකේත වැඩවර්ජනයක නිරත වීමට තීරණය කර තිබෙනවා.
මෙම වැඩවර්ජනය අද උදෑසන 8:00 සිට හෙට උදෑසන 8:00 දක්වා ක්‍රියාත්මක කිරීමට නියමිතයි.
රජයේ වෛද්‍ය නිලධාරීන්ගේ සංගමය පෙන්වා දෙන්නේ, මෙම ගැටලුව සම්බන්ධයෙන් අවශ්‍ය පියවර ගන්නා බවට සෞඛ්‍ය අමාත්‍යාංශය මීට පෙර එකඟතාව පළ කර තිබුණද, බලධාරීන් එම එකඟතාවන් ක්‍රියාත්මක කිරීමට අපොහොසත් වී ඇති බවයි.
මෙම වර්ජනය හේතුවෙන් රෝහල තුළ දෛනික ප්‍රතිකාර සේවාවන් සියල්ල අඩාල වනු ඇති අතර, හදිසි සහ ජීවිතාරක්ෂක ප්‍රතිකාර සේවා පමණක් පවත්වාගෙන යනු ඇති බව රජයේ වෛද්‍ය නිලධාරීන්ගේ සංගමය සඳහන් කළා.
මේ අතර, තමන්ගේ ගැටලු විසඳීම සඳහා බලධාරීන් පියවර නොගතහොත් ඉදිරියේදී වෘත්තීය සමිති ක්‍රියාමාර්ගවල නිරත වන බව විශ්වවිද්‍යාල ආචාර්යවරුන්ගේ සමිති සම්මේලනය පවසනවා. එහි ලේකම් ජ්‍යෙෂ්ඨ කථිකාචාර්ය චාරුදත්ත ඉලංගසිංහ මහතා සඳහන් කළේ, සිය ගැටලු සම්බන්ධයෙන් සාකච්ඡා කිරීමට අවස්ථාවක් ලබා දෙන ලෙස ජනාධිපතිවරයාගෙන් ද ඉල්ලීමක් කරන බවයි.
