ශ්‍රී ලංකා ක්රිකට් ආයතනය පළමු වරට සංවිධානය කරන ජාතික සුපිරි ලීග කාන්තා එක්දින ක්රිකට් තරගාවලිය අද (6) ආරම්භ වීමට නියමිතය. තරගාවලිය ආරම්භ කරමින් අද දඹුල්ල සහ ගාල්ල කණ්ඩායම කොළඹ පී. සරා ඕවල් ක්‍රීඩාංගණයේදීත්, කොළඹ සහ නුවර කණ්ඩායම කෝල්ට්ස් ක්‍රීඩාංගණයේදීත් තරග වදිනු ඇත.
ශ්‍රී ලංකාව තුළ ක්රිකට් ක්‍රීඩාවේ ඉහළම ස්ථරය වන ජාතික සුපිරි ලීගයේ කාන්තා එක්දින තරගාවලිය සඳහා කොළඹ, දඹුල්ල, ගාල්ල සහ නුවර වශයෙන් කණ්ඩායම් 4ක් තරග වදිනු ඇත. මෙහිදී සෑම කණ්ඩායමක්ම අනෙක් කණ්ඩායම් සමගින් එක් තරග බැගින් ක්‍රීඩා කිරීමෙන් අනතුරුව වැඩිම ලකුණු හිමි කරගන්නා කණ්ඩායම් ලබන සඳුදා (12) කෝල්ට්ස් ක්‍රීඩාංගණයේ පැවැත්වෙන අවසන් තරගය සඳහා සුදුසුකම් හිමි කරගැනීමට නියමිතය.
මෙම තරගාවලිය සඳහා ක්‍රීඩිකාවන් 60ක් සහභාගී වනු ඇතැයි ශ්‍රී ලංකා ක්රිකට් ආයතනය නිවේදනය කළේය.
මෙම තරගාවලියෙන් අනතුරුව ජාතික සුපිරි ලීග කාන්තා විස්සයි විස්ස තරගාවලිය පෙබරවාරි 15 වැනිදා සිට ආරම්භ කෙරෙන අතර අදාළ තරගාවලිය පෙබරවාරි 20 දක්වා ක්‍රියාත්මක වනු ඇත.
