පර්සියානු බොක්ක අරාබි මුහුදට සම්බන්ධ කරන හෝමූස් සමුද්‍ර සන්ධිය හරහා ගමනාගමනය අවහිර කිරීම හෝ බාධා කිරීම, ගෝලීය බලශක්ති සුරක්ෂිතභාවයට සැලකිය යුතු බලපෑමක් ඇති කරනු ඇති බවට විශේෂඥයින් අනතුරු අඟවනවා.
ඊයේ (ජූනි 22) එක්සත් ජනපදය ඉරානයේ ප්‍රධාන න්‍යෂ්ටික ස්ථාන තුනකට බෝම්බ හෙලීමෙන් පසුව, නැව්ගත කිරීම සඳහා හෝමූස් සමුද්‍ර සන්ධිය වසා දැමීම, විරුද්ධවාදීන්ට බලපෑම් කිරීම සඳහා තමන් සතු විකල්පයන්ගෙන් එකක් බව ටෙහෙරානය ප්‍රකාශ කර තිබෙනවා. ඉරානය ඊශ්‍රායලය සමඟ සතුරුකම් ආරම්භ කළ දා සිට, ඉරාන නිලධාරීන් මෙම සමුද්‍ර සන්ධිය වසා දැමීමේ හැකියාව පිළිබඳව සාකච්ඡා කරමින් සිටියා.
ලෝක තෙල්වලින් සියයට 30කට ආසන්න ප්‍රමාණයක් සහ ලෝකයේ LNG (ද්‍රව ස්වභාවික වායු) වලින් තුනෙන් එකක් දිනපතා මෙම සමුද්‍ර සන්ධිය හරහා ගමන් කරයි. එම නිසා, එය වසා දැමීම ගෝලීය සැපයුම් වහාම අඩු කරනු ඇති අතර එමඟින් මිල ගණන් විශාල ලෙස ඉහළ යා හැකියි.
ඉරාන ජාතික ආරක්ෂක සහ විදේශ ප්‍රතිපත්ති කමිටුවේ සාමාජිකයෙකු වන ජ්‍යෙෂ්ඨ නීති සම්පාදක එස්මේල් කොව්සාරි ප්‍රකාශ කළේ, ඇමරිකානු ආක්‍රමණයට සහ ජාත්‍යන්තර ප්‍රජාවේ නිහඬතාවයට ප්‍රතිචාරයක් ලෙස ගෝලීය බලශක්ති වෙළෙඳාමේ මෙම ප්‍රධාන ස්ථානය වසා දැමීමට ඉරාන පාර්ලිමේන්තුව මේ වන විට තීරණය කර ඇති බවයි. කෙසේ වෙතත්, මෙම සමුද්‍ර සන්ධිය වසා දැමීම සම්බන්ධයෙන් නීති සම්පාදකයින් සම්මුතියකට පැමිණ ඇති නමුත්, අවසන් තීරණය ඉරානයේ උත්තරීතර ජාතික ආරක්ෂක කවුන්සිලය විසින් ගනු ලබන බවද ඔහු වැඩිදුරටත් කියා සිටියා.
විශේෂඥයින් පවසන්නේ, මෙම සමුද්‍ර සන්ධිය වසා දැමුවහොත්, පළමු සතිය තුළදීම ඉන්ධන මිල 80%කින් පමණ ඉහළ යාමට ඉඩ ඇති බවයි. විකල්ප මාර්ග සඳහා අධික පිරිවැයක් දැරීමට සිදුවන බැවින්, මෙය ගෝලීය ආර්ථිකයට දැවැන්ත බලපෑමක් ඇති කරනු ඇතැයි ඔවුන් අනතුරු අඟවනවා.
මෙය ලෝකයේ ප්‍රධානතම තෙල් හා ගෑස් සැපයුම් මාර්ගයක් වන බැවින්, මෙහි සිදුවන ඕනෑම බාධාවක් ගෝලීය බලශක්ති සුරක්ෂිතභාවයට සෘජු තර්ජනයක් එල්ල කරනු ඇත.
