හිටපු ජනාධිපති රනිල් වික්‍රමසිංහ මහතාගේ බිරිඳ වන මහාචාර්ය මෛත්‍රී වික්‍රමසිංහ මහත්මිය, අද (20) අපරාධ පරීක්ෂණ දෙපාර්තමේන්තුවේ (CID) මූල්‍ය අපරාධ විමර්ශන කොට්ඨාසය හමුවේ පෙනී සිටීමට නොහැකි බව දැනුම් දී තිබේ.

තමන් දැනට සෞඛ්‍ය හේතූන් මත ප්‍රතිකාර ලබමින් සිටින බැවින් මෙලෙස පැමිණීමට නොහැකි බව ඇය ලිපියක් මගින් අදාළ කොට්ඨාසය වෙත දන්වා ඇත.

හිටපු ජනාධිපතිවරයාට සමීප ආරංචි මාර්ග සඳහන් කරන්නේ, තමන්ට නිවසේ රැඳී සිට ප්‍රතිකාර ගන්නා ලෙස වෛද්‍යවරුන් උපදෙස් දී ඇති බව මහාචාර්යවරිය සිය ලිපියේ දක්වා ඇති බවයි. එබැවින්, මෙම විමර්ශනයට අදාළ ප්‍රකාශය අවශ්‍ය නම් තමන් පදිංචි නිවසට පැමිණ ලබා ගන්නා ලෙස ද ඇය CID නිලධාරීන්ගෙන් ඉල්ලා තිබේ.

අපරාධ පරීක්ෂණ දෙපාර්තමේන්තුව මෙම ප්‍රකාශය ලබා ගැනීමට සූදානම් වන්නේ රජයේ මුදල් අවභාවිතයක් පිළිබඳව කෙරෙන පරීක්ෂණයකට අදාළවය,

හිටපු ජනාධිපති රනිල් වික්‍රමසිංහ මහතා එංගලන්තයේ සිදු කළ පෞද්ගලික සංචාරයක් වෙනුවෙන් රුපියල් ලක්ෂ 166කට (රු. 16,600,000) අධික රජයේ මුදල් අවභාවිත කර ඇති බවට එල්ල වී ඇති චෝදනාව.

මෙම සිද්ධිය සම්බන්ධයෙන් මහාචාර්ය මෛත්‍රී වික්‍රමසිංහ මහත්මියගෙන් ප්‍රකාශයක් ලබා ගන්නා බව CID නිලධාරීන් පසුගියදා කොළඹ කොටුව මහේස්ත්‍රාත් අධිකරණයට ද කරුණු වාර්තා කර තිබුණි.

මහාචාර්යවරියගේ මෙම දැනුම් දීමෙන් පසුව, අපරාධ පරීක්ෂණ දෙපාර්තමේන්තුව ඇයගේ නිවසට ගොස් ප්‍රකාශය ලබා ගන්නේ ද නැතහොත් වෙනත් දිනයක් ලබා දෙන්නේ ද යන්න පිළිබඳව මෙතෙක් නිල තීරණයක් ප්‍රකාශයට පත් කර නොමැත.