ශ්‍රී ලංකාවේ බලශක්ති ක්ෂේත්‍රයේ දැවැන්තම වෙනස සනිටුහන් කරමින්, ලංකා විදුලිබල මණ්ඩලය (CEB) ප්‍රතිව්‍යුහගත කිරීමේ ක්‍රියාවලිය අද (09) සිට නිල වශයෙන් බලාත්මක වේ. ඒ අනුව දශක පහකට වැඩි කාලයක් මෙරට විදුලි බලය පාලනය කළ 1969 අංක 17 දරන ලංකා විදුලිබල මණ්ඩල පනත ඊයේ (08) මධ්‍යම රාත්‍රියෙන් අහෝසි වූ අතර, ඒ වෙනුවට නව සමාගම් හයක් හරහා විදුලි පද්ධතියේ මෙහෙයුම් සිදු කිරීමට තීරණය කර ඇත.

මෙම නව ව්‍යුහය යටතේ ස්ථාපනය කර ඇති ස්වාධීන සමාගම් 06 පහත දැක්වේ:

• විදුලි ජනන ලංකා (පුද්ගලික) සමාගම (විදුලි නිෂ්පාදනය සඳහා)

• ජාතික සම්ප්‍රේෂණ ජාල සේවා සපයන්නන්ගේ (පුද්ගලික) සමාගම (සම්ප්‍රේෂණ කටයුතු සඳහා)

• ජාතික පද්ධති ක්‍රියාකරු (පුද්ගලික) සමාගම (පද්ධති කළමනාකරණය සඳහා)

• විදුලි බෙදාහැරීම ලංකා (පුද්ගලික) සමාගම (පාරිභෝගික බෙදාහැරීම් සඳහා)

• සේවක අරමුදල (පුද්ගලික) සමාගම

• එනර්ජි වෙන්චර්ස් ලංකා (පුද්ගලික) සමාගම

මෙම පරිවර්තනයත් සමඟ ප්‍රධාන සමාගම් කිහිපයක මෙහෙයුම් කටයුතු සඳහා නව සාමාන්‍යාධිකාරීවරුන් පත් කිරීමට ද රජය පියවර ගෙන තිබේ. ඒ අනුව, විදුලි ජනන ලංකා සමාගමේ සාමාන්‍යාධිකාරී ලෙස ඉංජිනේරු එන්. ජී. සාලිය පණ්ඩිතරත්න මහතා ද, ජාතික සම්ප්‍රේෂණ ජාල සේවා සමාගම සඳහා ඉංජිනේරු එන්. එස්. වෙත්තසිංහ මහතා ද, විදුලි බෙදාහැරීමේ ලංකා සමාගම වෙනුවෙන් ඉංජිනේරු කේ. එස්. අයි. කුමාර මහතා ද පත් කර ඇත.

විදුලිබල මණ්ඩලය ආයතනයක් ලෙස නීත්‍යානුකූලවම අහෝසි වී මෙලෙස සමාගම්ගත කිරීම හරහා වඩාත් කාර්යක්ෂම සහ විනිවිදභාවයකින් යුත් සේවාවක් ලබා දීම රජයේ අපේක්ෂාවයි.