පවතින බලශක්ති අර්බුදය හමුවේ ඉන්ධන සහ විදුලිය පිරිමසා ගැනීමේ අරමුණින් සෑම සතියකම බදාදා දිනය විශේෂ රජයේ නිවාඩු දිනයක් ලෙස ප්‍රකාශයට පත් කිරීමට රජය තීරණය කර තිබේ. අත්‍යවශ්‍ය සේවා කොමසාරිස් ජනරාල් ප්‍රභාත් චන්ද්‍රකීර්ති මහතා ඊයේ (16) සඳහන් කළේ, මෙම විශේෂ නිවාඩු දිනයන්හිදී උපකාරක පන්ති (Tuition Classes) පැවැත්වීම සපුරා තහනම් වන බවයි.

මෙම නිවාඩුව පාසල්, විශ්වවිද්‍යාල, අධිකරණ සේවා ඇතුළු සියලුම රජයේ කාර්යාල සඳහා බලපැවැත්වේ. කෙසේ වෙතත්, මහජනතාවට අත්‍යවශ්‍ය සේවාවන් සපයන පහත සඳහන් අංශ මෙම නිවාඩුවට ඇතුළත් නොවේ:

• සෞඛ්‍ය සේවා

• වරාය සහ රේගුව

• බලශක්ති සහ ඉන්ධන සැපයුම්

• ජල සම්පාදන අංශ

රටේ පවතින තත්ත්වය සැලකිල්ලට ගෙන පෞද්ගලික අංශයේ ආයතන ද සෑම බදාදා දිනකම නිවාඩු දිනයක් ලෙස ප්‍රකාශයට පත් කරන ලෙස කොමසාරිස් ජනරාල්වරයා ඉල්ලා සිටියි. එමෙන්ම, නැවත දැනුම් දෙන තුරු සියලුම රාජ්‍ය උත්සව සහ උත්සව සංවිධානය කිරීම තාවකාලිකව අත්හිටුවීමට ද පියවර ගෙන ඇත.

මේ අතර සංචාරක, කෘෂිකර්ම සහ වැවිලි වැනි ප්‍රමුඛ ක්ෂේත්‍ර සඳහා අවශ්‍ය ඉන්ධන ප්‍රමාණයන් තක්සේරු කර, ඒ අනුව අමතර ඉන්ධන කෝටාවන් (Fuel Quota) නිකුත් කිරීමට රජය කටයුතු කරමින් සිටී.

රාජ්‍ය පරිපාලන අමාත්‍යාංශයේ ලේකම්වරයා සඳහන් කළේ බදාදා නිවාඩුව හැරුණු විට සතියේ ඉතිරි දින හතර තුළ සේවක මණ්ඩලය කළමනාකරණය කිරීමේ පූර්ණ බලය අමාත්‍යාංශ ලේකම්වරුන්ට සහ ආයතන ප්‍රධානීන්ට පවරා ඇති බවයි.

කෙසේ වෙතත්, මෙම හදිසි සේවා කප්පාදුව සහ නිවාඩු දින ප්‍රකාශයට පත් කිරීම හේතුවෙන් ඉදිරියේදී පැවැත්වීමට නියමිත රජයේ විභාග කාලසටහන්වලට යම් බලපෑමක් එල්ල වීමේ අවදානමක් පවතින බව ද හෙතෙම වැඩිදුරටත් අනාවරණය කළේය.