2026 වසරේ දෙවන කාර්තුව සඳහා විදුලි ගාස්තු ඉහළ නැංවීමට ශ්‍රී ලංකා මහජන උපයෝගීතා කොමිෂන් සභාව ඒකමතිකව අනුමැතිය ලබා දී තිබේ. ලංකා විදුලිබල මණ්ඩලය විසින් කරන ලද ඉල්ලීමකට අනුව මෙම සංශෝධනය සිදුවන අතර, නව ගාස්තු ක්‍රමය එළඹෙන අප්‍රේල් මස 01 වනදා සිට ක්‍රියාත්මක වීමට නියමිතය.

මෙම සංශෝධනය යටතේ විදුලි පාරිභෝගිකයන් කාණ්ඩ කිහිපයක් යටතේ ගාස්තු ඉහළ දමා ඇති අතර, අඩු ඒකක ප්‍රමාණයක් පරිභෝජනය කරන පවුල් සඳහා සාපේක්ෂව අඩු වැඩිවීමක් සිදු කර තිබීම විශේෂත්වයකි.

ගෘහස්ථ කාණ්ඩයේ විදුලි පරිභෝජනය අනුව මාසික බිලට එකතු වන අතිරේක මුදල පහත පරිදි වේ:

ඒකක 0 – 30 දක්වා: 4.3% කින් ඉහළ යන අතර මාසික වැඩිවීම රුපියල් 15 කි.

ඒකක 31 – 60 දක්වා: 6.9% කින් ඉහළ යන අතර මාසික වැඩිවීම රුපියල් 45 කි.

ඒකක 61 – 91 දක්වා: 6.9% කින් ඉහළ යන අතර මාසික වැඩිවීම රුපියල් 120 කි.

ඒකක 91 – 180 දක්වා: 7.1% කින් ඉහළ යන අතර මාසික වැඩිවීම රුපියල් 420 කි.

ඒකක 180 ට වැඩි: උපරිම ප්‍රතිශතය වන 25% කින් ගාස්තු ඉහළ දමා ඇත.

ආගමික සහ පුණ්‍ය ආයතන සඳහා යම් සහනයක් ලබා දීමට මහජන උපයෝගීතා කොමිසම පියවර ගෙන තිබේ. ඒ අනුව ඒකක 180 ට අඩු පරිභෝජනයක් සහිත ආගමික ස්ථාන සඳහා ගාස්තු වැඩි නොවන අතර, ඒකක 180 ඉක්මවන ආයතන සඳහා පමණක් 9.6% ක වැඩිවීමක් සිදු වේ.

මීට අමතරව, රාජ්‍ය ආයතන සඳහා විදුලි ගාස්තුව 14.1% ක ඉහළ අගයකින් වැඩි කර ඇති අතර, පොදු කාර්ය පාරිභෝගිකයන් සඳහා 8% ක වැඩිවීමක් අනුමත කර ඇත.

මෙරට නිෂ්පාදන ක්ෂේත්‍රය ආරක්ෂා කර ගැනීම උදෙසා කර්මාන්ත අංශයේ විදුලි ගාස්තු වැඩිවීම 8.7% ක මට්ටමක සීමා කිරීමට කොමිෂන් සභාව තීරණය කර තිබේ. මෙය ලංකා විදුලිබල මණ්ඩලය මුලින් අපේක්ෂා කළ අගයට වඩා අඩු මට්ටමකි.

ගෘහස්ථ (ඒකක 180 ට වැඩි) – 25%

රාජ්‍ය ආයතන – 14.1%

ආගමික ස්ථාන (ඒකක 180 ට වැඩි) – 9.6%

කර්මාන්ත අංශය – 8.7%

පොදු කාර්ය – 8%