හිටපු ජනාධිපති රනිල් වික්රමසිංහ මහතාට එරෙහිව පොදු දේපළ පනත යටතේ ගොනු කර ඇති නඩුව අද (29) කොළඹ කොටුව මහෙස්ත්රාත් අධිකරණය හමුවේ යළි කැඳවීමට නියමිතය. රජයේ මුදල් සාවද්ය ලෙස පරිහරණය කළ බවට එල්ල වී ඇති චෝදනා සම්බන්ධයෙන් මෙහිදී කරුණු සලකා බැලෙනු ඇත.
රනිල් වික්රමසිංහ මහතා ජනාධිපති ධුරය හොබවන සමයේ, ඔහුගේ බිරිඳ වන මහාචාර්ය මෛත්රී වික්රමසිංහ මහත්මියගේ උපාධි ප්රදානෝත්සවයකට සහභාගී වීම සඳහා සිදුකළ ලන්ඩන් සංචාරය මෙම නඩුවට පාදක වී තිබේ. එම පෞද්ගලික සංචාරය වෙනුවෙන් රජයේ මුදල් අවභාවිත කර ඇති බවට එල්ල වූ පැමිණිල්ලකට අනුව අපරාධ පරීක්ෂණ දෙපාර්තමේන්තුව (CID) මඟින් පුළුල් විමර්ශනයක් ආරම්භ කර ඇත.
මෙම විමර්ශනවල තීරණාත්මක පියවරක් ලෙස, අපරාධ පරීක්ෂණ දෙපාර්තමේන්තුවේ නිලධාරීන් පසුගිය අප්රේල් 24 වනදා මහාචාර්ය මෛත්රී වික්රමසිංහ මහත්මියගේ පෞද්ගලික නිවසේදී ඇයගෙන් ප්රකාශයක් ලබා ගැනීමට කටයුතු කළේය. පැය හතරකට ආසන්න කාලයක් පුරා ඇයගෙන් ප්රශ්න කර අදාළ සංචාරයට අදාළ මූල්යමය තොරතුරු සටහන් කරගත් බව වාර්තා වේ.
අද දින අධිකරණයේදී විමර්ශනවල වත්මන් ප්රගතිය පිළිබඳව අපරාධ පරීක්ෂණ දෙපාර්තමේන්තුව කරුණු ඉදිරිපත් කිරීමට නියමිතය. හිටපු ජනාධිපතිවරයෙකුට එරෙහිව පොදු දේපළ පනත යටතේ මෙලෙස නීතිය ක්රියාත්මක වීම දේශපාලන ක්ෂේත්රය තුළ දැඩි කතාබහකට ලක්ව ඇති කරුණකි.
