වනාතවිල්ලුව, කරතිව් ප්රදේශයේ පිහිටි මහා පරිමාණ කජු වගා බිමකට හොර රහසේ ඇතුළු වූ පුද්ගලයෙකුට එහි සිටි මුරකරුවෙකු විසින් වායු රයිෆලයකින් (Air Rifle) තැබූ වෙඩි ප්රහාරයකින් එම පුද්ගලයා අවාසනාවන්ත ලෙස ජීවිතක්ෂයට පත්ව තිබේ.
අද (09) අලුයම 1.30 ට පමණ සිදුවූ මෙම වෙඩි තැබීමට සෘජුවම සම්බන්ධ සහ ඊට අනුබල දුන් බවට සැකකෙරෙන පුද්ගලයන් 08 දෙනෙකු වනාතවිල්ලුව පොලිසිය විසින් මේ වන විට අත්අඩංගුවට ගෙන ඇත. මෙලෙස මියගොස් ඇත්තේ අතුකෝරලගේ ප්රදීප් සුසන්ත නැමැති 38 හැවිරිදි වියේ පසුවූ පුද්ගලයෙකි.
පොලිස් පරීක්ෂණවලට අනුව, හලාවත වැවිලි සමාගමට අයත් කරතිව් ප්රදේශයේ පිහිටි මෙම දැවැන්ත කජු ඉඩම, මෙවර කජු අස්වැන්න නෙලා ගැනීම සඳහා බදු පදනම මත ලබාගෙන ඇත්තේ කල්පිටිය ප්රදේශයේ පදිංචි ව්යාපාරිකයෙකු විසිනි. වටිනා කජු වගාව සොරුන්ගෙන් ආරක්ෂා කරගැනීම වෙනුවෙන් බදුකරු විසින් රාත්රී කාලයට විශේෂ මුරකරුවන් පිරිසක් ද එහි සේවයේ යොදවා තිබුණි.
අද අලුයම් කාලයේදී මියගිය පුද්ගලයා කිසියම් හොර රහස් අරමුණක් වෙනුවෙන් මෙම කජු වගා භූමියට ඇතුළු වී ඇති අතර, ඒ පිළිබඳව විපරමෙන් සිටි මුරකරුවෙකු සන්තකයේ තිබූ වායු රයිෆලයකින් ඔහුට සෘජුවම වෙඩි තබා ඇත.
වෙඩි වැදීමෙන් බරපතල ලෙස තුවාල ලබා ලේ විලක් මැද ඇද වැටී සිටි ප්රදීප් සුසන්ත නැමැති මෙම පුද්ගලයාව, පසුව වනාතවිල්ලුව පොලිසියේ මැදිහත් වීමෙන් වහාම ප්රතිකාර සඳහා පුත්තලම මූලික රෝහල වෙත ඇතුළත් කිරීමට පියවර ගැනුණි.
කෙසේ වෙතත්, ශරීරය තුළට ඇතුළු වූ වෙඩි උණ්ඩ හේතුවෙන් සිදුවූ අභ්යන්තර ලේ ගැලීම් සහ බරපතල තුවාල නිසා රෝහලේ ප්රතිකාර ලබමින් සිටියදී ඔහු ජීවිතක්ෂයට පත්ව ඇති බව වෛද්යවරුන් තහවුරු කළේය. මිනීමැරුම් චෝදනා සහ නීතිවිරෝධී ගිනිඅවි ළඟ තබා ගැනීම යටතේ අත්අඩංගුවට ගත් මුරකරුවන් ඇතුළු සැකකරුවන් 08 දෙනා පුත්තලම මහේස්ත්රාත් අධිකරණය වෙත ඉදිරිපත් කිරීමට නියමිත අතර වනාතවිල්ලුව පොලිසිය සිද්ධිය පිළිබඳ වැඩිදුර විමර්ශන ක්රියාත්මක කරයි.
