ඊයේ (05) ඇති වූ ලේ වැකි ගැටුමෙන් පසු අද උදෑසන වන විට තත්ත්වය පාලනය කර තිබුණ ද, මීගමුව බන්ධනාගාරය ඇතුළත මේ වන විට යළිත් වරක් දැඩි නොසන්සුන්කාරී තත්ත්වයක් නිර්මාණය වී තිබේ.

අද (06) දින අලුතින් හටගත් මෙම උණුසුම්කාරී වාතාවරණය හේතුවෙන් තවත් පුද්ගලයන් 08 දෙනෙකු තුවාල ලබා ප්‍රතිකාර සඳහා කඩිනමින් රෝහල්ගත කර ඇති බව නවතම වාර්තා සඳහන් කරයි.

මීගමුව බන්ධනාගාරය තුළ රිමාන්ඩ් භාරයේ පසුවන සැකකරුවන් සහ දඬුවම් නියම වී සිටින රැඳවියන් දෙපිරිසක් අතර ඊයේ පස්වරු 1.00ට පමණ මුලින්ම මෙම දරුණු ගැටුම ආරම්භ විය.

ඊයේ දින සිදු වූ විනාශය: ඊයේ පැවැති දරුණු ගැටුම් හේතුවෙන් රැඳවියන් දෙදෙනෙකු (02) ජීවිතක්ෂයට පත් වූ අතර, තවත් 38 දෙනෙකු තුවාල ලබා මේ වන විටත් රෝහල්ගතව ප්‍රතිකාර ලබමින් පසුවේ.

ඊයේ සිදු වූ මරණ සහ තුවාලවීම් සම්බන්ධයෙන් රැඳවියන් තුළ පැවැති දැඩි නොසන්සුන්භාවය අද දහවල් වන විට නැවතත් ප්‍රචණ්ඩකාරී මුහුණුවරක් ගෙන ඇති බව බන්ධනාගාර ආරංචි මාර්ග පවසයි.

යළිත් හටගත් මෙම ගැටුම්කාරී තත්ත්වය මර්දනය කර බන්ධනාගාරයේ ආරක්ෂාව තහවුරු කිරීම සඳහා පොලීසිය, පොලිස් විශේෂ කාර්ය බලකාය (STF) සහ යුද හමුදාව අතිරේක බලඇණි යොදවමින් බන්ධනාගාර පරිශ්‍රය තුළ විශේෂ මෙහෙයුමක් මේ වන විටත් ක්‍රියාත්මක කරමින් පවතී.