කෘතිම බුද්ධිය හෙවත් AI තාක්ෂණය වේගයෙන් ව්‍යාප්ත වීමත් සමඟ මතුව ඇති රැකියා අර්බුදය සහ සදාචාරාත්මක ගැටලු පිළිබඳව ලෝක අවධානය යොමු කරමින් “AI Impact Summit 2026” ගෝලීය සමුළුව අද (16) ඉන්දියාවේ නවදිල්ලි නුවරදී උත්සවශ්‍රීයෙන් ආරම්භ වේ.

ඉන්දීය අග්‍රාමාත්‍ය නරේන්ද්‍ර මෝදි මහතාගේ ප්‍රධානත්වයෙන් පැවැත්වෙන මෙම පස්දින සමුළුව සඳහා ලෝක නායකයින් 20 දෙනෙකු සහ රටවල් 45ක් නියෝජනය කරමින් අමාත්‍ය මට්ටමේ දූත පිරිසක් සහභාගී වීමට නියමිතය.

AI තාක්ෂණය මානව වර්ගයාගේ යහපතට යොදා ගන්නා අතරතුරම, ඉන් මතුවන අභියෝග කළමනාකරණය කිරීම සඳහා පොදු එකඟතාවක් ඇති කර ගැනීම මෙහි ප්‍රධාන අරමුණයි. එහිදී පහත අංශ කෙරෙහි විශේෂ අවධානයක් යොමු කෙරේ,

ව්‍යාජ දෘශ්‍ය අන්තර්ගතයන් (Deepfakes) මගින් සිදුවන සමාජ හායනය වැළැක්වීම සහ ළමුන්ට හානිකර අන්තර්ගතයන් පාලනය කිරීමට දැඩි නීතිමය රාමුවක් සකස් කිරීම.

AI ආක්‍රමණය හමුවේ අහිමි වන රැකියා සහ නව වෘත්තීය අවස්ථා නිර්මාණය කිරීම පිළිබඳව සාකච්ඡා කිරීම.

AI පද්ධති ක්‍රියාත්මක කිරීමේදී වැයවන අධික බලශක්තිය සහ ඉන් පරිසරයට සිදුවන බලපෑම අවම කිරීම.

මෙම සමුළුව අවසානයේදී, AI තාක්ෂණය සදාචාරාත්මකව භාවිත කිරීම සහ ගෝලීය ආරක්ෂාව තහවුරු කිරීම සඳහා වන “පොදු මාර්ග සිතියමක්” (Global Roadmap) ප්‍රකාශයට පත් කිරීමට අපේක්ෂිතය. තාක්ෂණික ලෝකයේ දැවැන්තයින් සහ රාජ්‍ය තාන්ත්‍රිකයින් එක්ව ගන්නා මෙම තීරණ, ඉදිරි දශකයේ තාක්ෂණික ගමන් මඟ තීරණය කරනු ඇතැයි විශ්වාස කෙරේ.