2026 විස්සයි-20 ලෝක කුසලාන ක්‍රිකට් තරගාවලියේ අවසන් පූර්ව වටය සඳහා වන බලාපොරොත්තු තීරණය කෙරෙන තීරණාත්මක මෙන්ම තියුණු තරගයක් අද (25) රාත්‍රී 7:00 ට කොළඹ ආර්. ප්‍රේමදාස ජාත්‍යන්තර ක්‍රිකට් ක්‍රීඩාංගණයේදී ආරම්භ වීමට නියමිතය. මෙම ‘සුපිරි 8’ වටයේ සටනේදී ශ්‍රී ලංකා කණ්ඩායම ප්‍රබල නවසීලන්ත කණ්ඩායම සමඟ තරග බිමට පිවිසෙන්නේ අවසන් පූර්ව වටයේ සිය ස්ථානය සුරක්ෂිත කර ගැනීම සඳහා මෙම තරගය ජය ගැනීම අනිවාර්යය යන දැඩි ඉලක්කය පෙරදැරි කරගෙනය.

තරගය නැරඹීම සඳහා පැමිණෙන ක්‍රීඩාලෝලීන් වෙනුවෙන් ක්‍රීඩාංගණයේ ඇතුළුවීමේ කවුළු පස්වරු 4:00 ට විවෘත කිරීමට සංවිධායකයින් කටයුතු කර ඇත. ඇතුළුවීමේදී ඇතිවිය හැකි තදබදය අවම කර ගැනීම සඳහා හැකි ඉක්මනින් ක්‍රීඩාංගණය වෙත පැමිණෙන ලෙස ශ්‍රී ලංකා ක්‍රිකට් ආයතනය ප්‍රේක්ෂකයන්ගෙන් ඉල්ලා සිටියි. ප්‍රවේශ පත්‍ර පරීක්ෂාව සහ ආරක්ෂක විධිවිධාන හේතුවෙන් සිදුවන ප්‍රමාදයන් මඟහරවා ගැනීමට කල්වේලා ඇතිව පැමිණීම වඩාත් පහසු වනු ඇත.

මේ අතර, තරගය පැවැත්වෙන ප්‍රදේශය ආශ්‍රිතව මහජන ආරක්ෂාව සහ රථවාහන පාලනය සඳහා පොලිසිය විසින් විශේෂ මෙහෙයුම් සැලැස්මක් ක්‍රියාත්මක කර තිබේ. ක්‍රීඩාංගණය අවට මාර්ගවල විශේෂ රථවාහන සංවිධානයක් පවතින බැවින් විකල්ප මාර්ග භාවිත කරන ලෙසත්, පොලිස් නිලධාරීන්ගේ උපදෙස් පිළිපදින ලෙසත් ජනතාවට දැනුම් දී ඇත.