ලොව තීරණාත්මක මුහුදු මාර්ගයක් වන හෝමුස් සමුද්ර සන්ධිය හරහා ගමන් ගන්නා නෞකාවලින් විශේෂ ගාස්තුවක් අය කිරීම සඳහා අවශ්ය නීතිමය පියවර ගැනීමට ඉරාන රජය සූදානම් වෙයි. ඉරාන පාර්ලිමේන්තුවේ සිවිල් කටයුතු පිළිබඳ කමිටුවේ සභාපතිවරයා උපුටා දක්වමින් විදෙස් මාධ්ය වාර්තා කරන්නේ, මේ සඳහා වන නව පනත් කෙටුම්පත මේ වන විටත් සකස් කර අවසන් අදියරේ පවතින බවයි.
මෙම නව සැලසුම යටතේ, හෝමුස් සමුද්ර සන්ධිය භාවිතා කරන නෞකාවල ආරක්ෂාව තහවුරු කිරීම වෙනුවෙන් ඉරානය විසින් පිරිවැයක් දැරීමට සිදුවන බැවින්, ඒ සඳහා අදාළ නෞකා හිමියන්ගෙන් ගාස්තුවක් අය කළ යුතු බව ඉරාන බලධාරීන් පෙන්වා දෙයි. මෙය ඕනෑම ගොඩබිම් ප්රවාහන මාර්ගයකදී අය කෙරෙන බදු මුදලක් වැනි සාමාන්ය ක්රියාවලියක් බව ද ඔවුන් වැඩිදුරටත් සඳහන් කරයි.
වත්මන් මැදපෙරදිග යුදමය තත්ත්වය සමනය කිරීම සඳහා ඉරානය විසින් ඉදිරිපත් කර ඇති ප්රධාන කොන්දේසි පහ අතරට ද මෙම කරුණ ඇතුළත් කර තිබේ. හෝමුස් සමුද්ර සන්ධිය මත ඉරානයට පවතින පාලන බලය සහ එහිදී ගාස්තු අය කිරීමට ඇති අයිතිය ජාත්යන්තර ප්රජාව විසින් පිළිගත යුතු බව ඉරානය අවධාරණය කරයි.
හෝමුස් සමුද්ර සන්ධිය හරහා ලොව බොරතෙල් සැපයුමෙන් විශාල ප්රමාණයක් ප්රවාහනය කෙරෙන බැවින්, ඉරානය ගැනීමට යන මෙම තීරණය ගෝලීය බලශක්ති වෙළෙඳපොළට මෙන්ම නාවික ගමනාගමනයට ද සෘජු බලපෑමක් එල්ල කරනු ඇතැයි ආර්ථික විශේෂඥයෝ පෙන්වා දෙති.
