ශ්‍රී ලංකා ක්‍රිකට් ටෙස්ට් නායක ධනංජයද සිල්වා සහ සීමිත පන්දුවාර නායක චරිත් අසලංක ප්‍රමුඛ ක්‍රිකට් ක්‍රීඩකයන් පිරිසක් විසින් නීතිය හමුවට යෑම සඳහා හේතුවී ඇත්තේ ශ්‍රී ලංකා ක්‍රිකට් ආයතනය හරහා ඔවුනට හිමිවන දීමනාවන්ගෙන් සියයට තිස්හයත්, හතලිහත් අතර කොටසක් බදු වශයෙන් අයකරගැනීමට කටයුතු යෙදී තිබීම නිසා යැයි පැවසේ.
ජාතික කණ්ඩායමේ ක්‍රීඩකයින්, ශ්‍රී ලංකා ක්‍රිකට් ආයතනයේ සේවකයන් ලෙසින් අර්ථ දක්වමින් ඔවුනට හිමිවන දීමනා, රඳවා ගැනීමේ බද්දකට යටත් කිරීමට දේශීය ආදායම් දෙපාර්තමේන්තුව ගෙන ඇති තීරණයට එරෙහිව, එය බලරහිත කරමින් රිට් ආඥාවක් නිකුත් කරන ලෙස ධනංජය ද සිල්වා සහ චරිත් අසලංක ඉකුත්දා අභියාචනාධිකරණයට පෙත්සමක් ඉදිරිපත් කළහ. එකී පෙත්සමට වනිඳු හසරංග, ඇන්ජලෝ මැතිව්ස්, මහීෂ් තීක්ෂණ, පැතුම් නිශ්ශංක, කුසල් මෙන්ඩිස් ඇතුළු ජාතික මට්ටමේ ක්‍රිකට් ක්‍රීඩකයින් 38 දෙනෙකුද අත්සන් යොදා තිබුණි.
ශ්‍රී ලංකා ක්‍රිකට් ආයතනය සමග කොන්ත්‍රාත්තුවකට යටත්වන ක්‍රීඩකයන් එම ආයතනයේ සේවකයන් ලෙසින් අර්ථකථනය කරමින් මෙම බද්දට යටත් කිරීම මෙහිදී ඔවුන් විසින් අභියෝගයට ලක්කරන ලදි. ශ්‍රී ලංකා ක්‍රිකට් ආයතනය සමගින් වන අදාළ ගිවිසුම යටතේ තමන් ස්වාධීන සේවා සපයන්නන් පමණක් බව එකී පෙත්සමෙන් අවධාරණය කර ඇති අදාළ ක්‍රිකට් ක්‍රීඩකයන්, සේවක අර්ථ සාධක අරමුදල හෝ සේවා නියුක්තිකයන්ගේ භාර අරමුදල හෝ පාරිතෝෂික වැනි ආයතනික හිමිකම් නොලබන තමන්ව ශ්‍රී ලංකා ක්‍රිකට් ආයතනයේ සේවකයන් ලෙසින් අර්ථ දක්වා තිබීම අසාධාරණ සහ අත්තනෝමතික බව පවසයි. ශ්‍රී ලංකා ක්‍රිකට් ආයතනය හා තමන් අතර ඇති ගිවිසුමේ අවිනිශ්චිතබව සහ කාලරාමු පිළිබඳවද ඔවුන් විසින් අධිකරණයේ අවධානයට යොමුකර තිබිණි. ගිවිසුම් නැවත අලුත් කිරීම මෙන්ම ගෙවනු ලබන දීමනාවල ස්ථාවර බව සම්බන්ධයෙන් ද සැලකිය යුතු අවිනිශ්චිතතාවයක් සහිත මෙන්ම මාස 12කට පමණක් වලංගු වන සේවා කාලය සහිත මෙකී ගිවිසුම් කොන්දේසිවල ස්වභාවය අනුව තමන් ලබන්නේ වැටුපක් නොව ගාස්තුවක් පමණක් බව පැමිණිලකාර පාර්ශ්වය විසින් මෙහිදී පෙන්වා දී තිබුණි.
එසේ තිබියදී 2024 ඔක්තෝබර් මාසයේදී දේශීය ආදායම් දෙපාර්තමේන්තුව ලිපියක් මගින් ජාතික ක්‍රිකට් ක්‍රීඩකයින් ශ්‍රී ලංකා ක්‍රිකට් ආයතනයේ සේවකයින් ලෙස වර්ගීකරණය කර ඇතැයි එකී පෙත්සමේ සඳහන්ව ඇත. ක්‍රිකට් ක්‍රීඩකයින් කිසිදු බදු ගෙවීමකින් වැළකී සිටීමට උත්සාහ නොකරන බවත්, බොහෝ ක්‍රිකට් ක්‍රීඩකයන් කාලයක් මුළුල්ලේ ස්වයං තක්සේරු හරහා බදු ගෙවා ඇති බවත් මෙම පෙත්සම මගින් වැඩිදුරටත් පෙන්වා දී ඇත. දේශීය ආදායම් කොමසාරිස් ජනරාල්, එහි නියෝජ්‍ය කොමසාරිස්වරයා, ශ්‍රී ලංකා ක්‍රිකට් ආයතනයේ සභාපති ඇතුළු එහි විධායක කමිටු සාමාජිකයින්, විගණකාධිපතිවරයා ඇතුලු පිරිසක් මෙම පෙත්සමේ වගඋත්තරකරුවන් ලෙසින් නම් කර ඇත.
