කොළඹ දිස්ත්‍රික්කයේ ඉඩම් මිල දර්ශකය අඛණ්ඩව ඉහළ යෑමේ ප්‍රවණතාවක් පෙන්නුම් කරන බව මහ බැංකු දත්ත වාර්තා පෙන්වා දෙයි. ඒ අනුව, 2024 වසරේ දෙවන භාගයට සාපේක්ෂව 2025 වසරේ දෙවන භාගය අවසන් වන විට කොළඹ ඉඩම් මිල සමස්තයක් ලෙස සියයට 10.6ක වාර්ෂික වර්ධනයක් වාර්තා කර තිබේ.

මෙම මිල ඉහළ යෑම නේවාසික, වාණිජ සහ කාර්මික යන අංශ තුනෙහිම පැහැදිලිව දක්නට ලැබීම විශේෂත්වයකි. එහිදී නේවාසික ඉඩම් මිල සියයට 12.4කින් ද, වාණිජ ඉඩම් මිල සියයට 11.3කින් ද ඉහළ ගොස් ඇති අතර, කාර්මික ඉඩම් මිල සියයට 8.0ක වාර්ෂික වර්ධනයක් සටහන් කර ඇත.

කෙසේ වෙතත්, 2025 වසරේ පළමු මාස හයට සාපේක්ෂව දෙවන මාස හය තුළ ඉඩම් මිල ඉහළ යෑමේ වේගය මධ්‍යස්ථ මට්ටමක පැවති බව නිරීක්ෂණය වේ. එම අර්ධ වාර්ෂික කාලසීමාව තුළදී වුවද නේවාසික සහ වාණිජ යන අංශවල මිල වර්ධනය අනෙක් අංශවලට වඩා කැපී පෙනෙන මට්ටමක පවතින බව එම වාර්තා වැඩිදුරටත් පෙන්වා දෙයි.