ජාතික ඩෙංගු මර්දන ඒකකයේ දත්තවලට අනුව, මේ වසරේ මේ දක්වා ඩෙංගු වැළඳුණු පුද්ගලයන්ගේ ගණන 19,900 ඉක්මවා ගොස් තිබෙනවා. මැයි මාසයේ පළමු සති දෙක තුළ පමණක් රෝගීන් 2,178ක් හඳුනාගෙන ඇති බව එම ඒකකය පෙන්වා දෙනවා.

වැඩිම ඩෙංගු රෝගීන් සංඛ්‍යාවක් වාර්තා වී ඇත්තේ බස්නාහිර පළාතෙන් වන අතර එය 640ක්. රත්නපුර දිස්ත්‍රික්කයෙන්ද රෝගීන් 386ක් හමුවී ඇති අතර, මේ වසරේ මේ වන විට ඩෙංගු හේතුවෙන් සිදුවූ මරණ සංඛ්‍යාව 7ක්.

මේ තත්ත්වය සැලකිල්ලට ගෙන ඩෙංගු මදුරු ව්‍යාප්තිය පාලනය කිරීම සඳහා මැයි 19 සිට 24 දක්වා විශේෂ මදුරු මර්දන සතියක් ක්‍රියාත්මක කිරීමට නියමිත බව ජාතික ඩෙංගු රෝග මර්දන ඒකකයේ අධ්‍යක්ෂ විශේෂඥ වෛද්‍ය සුදත් සමරවීර මහතා ඊයේ කොළඹ පැවති මාධ්‍ය හමුවකදී ප්‍රකාශ කළා.