කොළඹ වරායට අභියෝගයක් එල්ල කරමින් ඉන්දියාවේ කේරළ ප්‍රාන්තයේ විසිංජාම් නමැති ස්ථානයේ අන්තර්ජාතික ගැඹුරු ජල බහුකාර්ය වරායක් විවෘත කර තිබෙනවා.
ඉන්දීය අග්‍රාමාත්‍ය නරේන්ද්‍ර මෝදි සහ ගෞතම් අදානි යන අය විසින් මෙම වරාය විවෘත කළ බව ඉන්දීය මාධ්‍ය වාර්තා කරනවා. මෙම වරාය ඉන්දියාවේ ප්‍රථම ප්‍රතිනැව්ගතකරණ කේන්ද්‍රස්ථානය ලෙස ඉතිහාසයට එක්වනු ඇති.
දකුණු ආසියාවේ ප්‍රධාන ප්‍රතිනැව්ගතකරණ මධ්‍යස්ථානය ලෙස දිගු කලක් ක්‍රියාත්මක වූ කොළඹ වරාය හරහා දැනට ගෙන යන භාණ්ඩවලින් සැලකිය යුතු ප්‍රමාණයක් ලබා ගැනීමට ඉන්දියාව මෙම වරාය ඉදිකර තිබෙනවා.
මෙමඟින් කොළඹ වරායට පමණක් නොව ඩුබායි වරායටද යම් බලපෑමක් ඇතිවිය හැකි බව මාධ්‍ය වාර්තා පෙන්වා දෙනවා.
රාජ්‍ය සහ පෞද්ගලික අංශවල සහයෝගීතාවයෙන් සංවර්ධනය කළ මෙම විසිංජාම් වරාය, බහාලුම් මෙහෙයවීමේදී ඉන්දියාව විදේශීය වරායන් මත යැපීම අඩු කරනු ඇති බව සඳහන්. තවද, තිරුවානන්පුරම් හි පිහිටි මෙම වරාය කලාපීය නාවික ගමන් මාර්ග වෙනස් කිරීමටත්, ජාත්‍යන්තර වෙළඳාමේ ඉන්දියාවේ ස්ථාවරය ශක්තිමත් කිරීමටත් ඉලක්ක කරගෙන නිර්මාණය කර තිබෙනවා.
