එක්සත් ජනපද ජනාධිපති ඩොනල්ඩ් ට්‍රම්ප් විසින් චීනයෙන් ආනයනය කරන භාණ්ඩ සඳහා සියයට 100ක අති විශාල අමතර තීරුබද්දක් පැනවීමටත්, ඇතැම් ‘විවේචනාත්මක මෘදුකාංග’ (Critical Software) සඳහා අපනයන පාලනයන් පැනවීමටත් තීරණය කර ඇති බව නිවේදනය කර තිබේ.

මෙම නව තීරුබදු සහ පාලනයන් 2025 නොවැම්බර් 1 වැනිදා සිට ක්‍රියාත්මක කිරීමට නියමිතය

ට්‍රම්ප් මෙම දැඩි තීරණය ගනු ලැබුවේ, චීනය විසින් දුර්ලභ පාංශු ඛනිජ (rare earths minerals) අපනයනය සඳහා නව පාලනයන් පැනවීමෙන් පැය කිහිපයකට පසුව වීම විශේෂත්වයකි.

දුර්ලභ පාංශු ඛනිජ යනු චීනය ගෝලීය සැපයුමෙන් සියයට 70ක් පමණ සපයන, මෝටර් රථ, ආරක්ෂක අංශ සහ අර්ධ සන්නායක වැනි ඉහළ තාක්ෂණික කර්මාන්ත සඳහා අත්‍යවශ්‍ය ද්‍රව්‍යයකි.

චීනයේ වාණිජ අමාත්‍යාංශය නිවේදනය කළේ, දෙසැම්බර් 1 වැනිදා සිට, එම රටෙන් ලැබෙන දුර්ලභ පාංශු ඛනිජවලින් සියයට 0.1කට වඩා අඩංගු නිෂ්පාදන අපනයනය කිරීමට විදේශීය ආයතන බලපත්‍රයක් ලබාගත යුතු බවයි.

දැනටමත් චීනයෙන් ආනයනය කරන සෑම භාණ්ඩයක්ම පාහේ අධික තීරුබදුවලට යටත් වන අතර, විශ්ලේෂකයන් පෙන්වා දෙන්නේ වත්මන් ‘ඵලදායී’ තීරුබදු අනුපාතය සියයට 40ක් බවයි (එය නිශ්චිත භාණ්ඩ මත සියයට 7.5 සිට 50 දක්වා වෙනස් වේ).

නව සියයට 100 අමතර තීරුබද්ද සමඟින්, සමස්ත තීරුබදු මට්ටම් ඉතා ඉහළ අගයක් ගන්නා අතර, එය ගෝලීය වෙළඳාමට දැඩි බලපෑමක් එල්ල කරනු ඇතැයි අපේක්ෂා කෙරේ. විශේෂයෙන්ම, මෙම තීරණය ලෝකයේ විශාලතම ආර්ථිකයන් දෙක අතර පවතින වෙළඳ යුද්ධය තවත් උග්‍ර කරනු ඇත.