අමෙරිකානු ජනාධිපති ඩොනල්ඩ් ට්‍රම්ප් අද (25) සිය වාර්ෂික රාජ්‍ය දේශනය (State of the Union address) පවත්වමින්, විදේශීය රටවලින් තීරුබදු අය කිරීමට තමන් ගත් තීරණය දැඩි ලෙස ආරක්ෂා කරමින් කතා කළේය.

පැයකුත් මිනිත්තු 48ක කාලයක් පුරා ජාතිය ඇමතූ ජනාධිපතිවරයා, මෙම බදු ප්‍රතිපත්තිය අමෙරිකානු ආර්ථිකයේ දැවැන්ත පෙරළියකට මගපාදා ඇති බවත්, තමන් සිදුකරමින් සිටින්නේ “යුගයකට සරිලන පරිවර්තනයක්” බවත් අවධාරණය කළේය.

විදේශීය භාණ්ඩ සඳහා පනවා ඇති මෙම තීරුබදු හරහා ලැබෙන ආදායම හේතුවෙන්, අමෙරිකානු ජනතාව මත පැටවී ඇති ආදායම් බදු බර ලිහිල් කිරීමට තමන්ට හැකි වූ බව ට්‍රම්ප් මෙහිදී ප්‍රකාශ කළේය. මෙමගින් වක්‍රව ජනතාවට ආර්ථික වාසි සැලසෙන බව පෙන්වා දුන් ඔහු, රටේ ආර්ථිකය ශක්තිමත් කිරීමට ඇති එකම මග තීරුබදු අයකර ගැනීම බව සිය දේශනය පුරාම අවධාරණය කිරීමට උත්සාහ කළේය.

මීට අමතරව, කලින් පනවා තිබූ දැඩි ආනයන බදු ඉවත් කිරීමට අමෙරිකානු ශ්‍රේෂ්ඨාධිකරණය මීට පෙර ලබා දුන් තීන්දුව ද ජනාධිපතිවරයාගේ දැඩි විවේචනයට ලක් විය. සෑම වසරකම මුල් භාගයේදී එරට ජනාධිපතිවරයා විසින් පවත්වනු ලබන මෙම සම්ප්‍රදායික දේශනය හරහා රටේ වත්මන් තත්ත්වය සහ ඉදිරි සැලසුම් පිළිබඳව ලෝකයේම අවධානය යොමුව තිබුණි.