ඉරානය ඉලක්ක කරගනිමින් ඇමෙරිකානු මධ්‍යම විධානය (CENTCOM) දියත් කළ ‘ඔපරේෂන් එපික් ෆියුරි’ (Operation Epic Fury) මෙහෙයුමේ පළමු පැය 24 තුළ පමණක් එරට ඉලක්ක 1,000කට අධික ප්‍රමාණයකට ප්‍රහාර එල්ල කර තිබේ. 2003 වසරේ සිදුවූ ඉරාක ආක්‍රමණයෙන් පසු මැදපෙරදිග කලාපය තුළ භාවිත කළ විශාලතම ගුවන් බලය මෙහෙයවමින් ඇමෙරිකාව මෙම ප්‍රහාර මාලාව ආරම්භ කර ඇත්තේ පෙබරවාරි 28 වැනිදා පෙරවරුවේ සිටයි.

මෙම දැවැන්ත මෙහෙයුම ඊශ්‍රායලය විසින් ක්‍රියාත්මක කරන ‘රෝරින් ලයන්’ (Operation Roaring Lion) මෙහෙයුම සමඟ ඉතා සමීප සහයෝගීතාවයකින් යුතුව දියත් කර ඇති බව විදෙස් මාධ්‍ය වාර්තා කරයි. ඉරානයේ න්‍යෂ්ටික වැඩසටහන් සහ බැලිස්ටික් මිසයිල ව්‍යාපෘති සම්බන්ධයෙන් පැවැති ජාත්‍යන්තර සාකච්ඡා එකඟතාවයකින් තොරව බිඳ වැටීම මෙම යුදමය පියවරට මූලික හේතුව වී තිබේ.

විශේෂයෙන්ම ඉරාන උත්තරීතර නායක අයතුල්ලා අලි කමේනි රැඳී සිටින නිශ්චිත ස්ථානය පිළිබඳව ලැබුණු තහවුරු කළ බුද්ධි තොරතුරු මත පදනම්ව මෙම ප්‍රහාර එල්ල කර ඇති බව පැවසේ. ඉරානයේ යුද ශක්තිය සහ මූලෝපායික මධ්‍යස්ථාන අඩපණ කිරීම අරමුණු කරගත් මෙම ඒකාබද්ධ මෙහෙයුම හේතුවෙන් මැදපෙරදිග කලාපය පුරා දැඩි යුදමය වාතාවරණයක් නිර්මාණය වී ඇත.