ගෝලීය දේශපාලනික අස්ථාවරත්වය සහ මැදපෙරදිග යුද උණුසුම හමුවේ ලෝක වෙළෙඳපොළේ බොරතෙල් මිල අද (09) පෙර නොවූ විරූ අයුරින් ඉහළ ගොස් තිබේ. විදෙස් මාධ්‍ය වාර්තා කරන පරිදි මෙය තෙල් මිල ඉතිහාසයේ එක් දිනක් තුළ වාර්තා වූ ඉහළම මිල වැඩිවීම ලෙස සැලකේ.

ඒ අනුව, ජාත්‍යන්තර වෙළෙඳපොළේ ප්‍රධාන තෙල් දර්ශකයක් වන බ්‍රෙන්ට් (Brent) බොරතෙල් බැරලයක මිල අමෙරිකානු ඩොලර් 119.50ක් දක්වා ඉහළ ගොස් ඇත. එමෙන්ම ඩබ්ලිව්.ටී.අයි (WTI) බොරතෙල් බැරලයක මිල ද අමෙරිකානු ඩොලර් 119.48ක් ලෙස සටහන් වී තිබීම විශේෂත්වයකි.

බලශක්ති විශේෂඥයන් පෙන්වා දෙන්නේ පවතින යුදමය වාතාවරණය හේතුවෙන් සැපයුම් දාමයට එල්ල වී ඇති බාධා සහ ප්‍රධාන නාවික මාර්ග අවහිර වීම මෙම ශීඝ්‍ර මිල ඉහළ යාමට සෘජුවම බලපා ඇති බවයි. මෙම තත්ත්වය ලෝක ආර්ථිකයට මෙන්ම ශ්‍රී ලංකාව වැනි ආනයනික ඉන්ධන මත යැපෙන රටවලට ද දැඩි බලපෑමක් එල්ල කරනු ඇතැයි අපේක්ෂා කෙරේ.