පසුගිය පැය කිහිපය තුළ ලෝක වෙළෙඳපොළේ බොරතෙල් මිල සියයට 9ක අගයකින් ශීඝ්‍ර ලෙස ඉහළ ගොස් තිබේ. විදෙස් මාධ්‍ය වාර්තා කරන පරිදි, මේ සමඟ බ්‍රෙන්ට් (Brent) බොරතෙල් බැරලයක මිල නැවත වරක් අමෙරිකානු ඩොලර් 100 සීමාව ඉක්මවා ගොස් ඇත.

මැදපෙරදිග කලාපයේ නෞකා සහ බලශක්ති යටිතල පහසුකම් ඉලක්ක කර ගනිමින් ඉරානය විසින් දියත් කරන ලද නව ප්‍රහාර මාලාව මෙම මිල ඉහළ යාමට සෘජුවම බලපා තිබේ. මෙම තත්ත්වයත් සමඟ පසුගිය දින කිහිපය පුරා තෙල් මිලෙහි දක්නට ලැබුණු ස්ථාවර භාවය යළිත් බිඳ වැටී ඇති බව ආර්ථික විශ්ලේෂකයෝ පෙන්වා දෙති.

පසුගිය ඉරිදා බොරතෙල් බැරලයක මිල ඩොලර් 118ක උපරිම අගයක් සටහන් කළ අතර, ඊයේ (11) දිනය වන විට එය ඩොලර් 88.97 දක්වා සැලකිය යුතු ලෙස පහත වැටී තිබුණි. එසේම පසුගිය 09 වැනිදා බ්‍රෙන්ට් බොරතෙල් බැරලයක මිල සටහන් වූයේ ඩොලර් 90.52ක් ලෙසයි.

කෙසේ වෙතත්, වත්මන් යුද ගැටුම් ආරම්භ වීමට පෙර ලෝක වෙළෙඳපොළේ බොරතෙල් බැරලයක් පැවතියේ ඩොලර් 70ක පමණ සාපේක්ෂව අඩු අගයකය. ඒ අනුව, වර්තමාන මිල ගණන් පූර්ව යුද සමයට වඩා තවමත් ඉහළ මට්ටමක පවතින අතර, කලාපීය නොසන්සුන්තාවය හමුවේ ඉදිරි දිනවලදී මිල ගණන් තවදුරටත් උච්චාවචනය වනු ඇතැයි වෙළඳපොළ ආරංචි මාර්ග පවසයි.