ශ්‍රී ලංකාවට දකුණු දෙසින් වූ මුහුදු තීරයේදී ඉරාන නාවික හමුදාවට අයත් ‘IRIS Dena’ නෞකාවට එල්ල වූ මාරාන්තික ප්‍රහාරය සම්බන්ධයෙන් සිය සතුරු පාර්ශ්ව වෙත දැඩි ප්‍රතිප්‍රහාර එල්ල කරන බව ඉරාන නාවික හමුදාපති රියර් අද්මිරාල් ෂහ්රම් ඉරානි (Shahram Irani) අනතුරු අඟවා තිබේ. අද (17) විශේෂ ප්‍රකාශයක් කරමින් ඔහු අවධාරණය කළේ, මෙම ප්‍රහාරයෙන් මියගිය නාවිකයන්ගේ ජීවිත වෙනුවෙන් නිසැකවම පළිගන්නා බවයි.

“අපි සතුරාගේ මෙම ම්ලේච්ඡ අපරාධය කිසිලෙසකත් අමතක කරන්නේ නැහැ. අපගේ ප්‍රාණ පරිත්‍යාගී නාවිකයන්ගේ රුධිරය වෙනුවෙන් සතුරාට නිසි දඬුවම් ලබා දීමට අපි සූදානම්,” යැයි නාවික හමුදාපතිවරයා ප්‍රකාශ කළේය. සතුරා කිසිසේත්ම බලාපොරොත්තු නොවන ස්ථානයක සිට අනපේක්ෂිත සහ මාරාන්තික ප්‍රහාර මාලාවක් එල්ල කරමින් මෙම “යුධ අපරාධයට” ප්‍රතිචාර දක්වන බව ද ඔහු වැඩිදුරටත් සඳහන් කර සිටියි.

පසුගිය මාර්තු 04 වැනිදා ගාල්ලට ඔබ්බෙන් වූ ජාත්‍යන්තර මුහුදු තීරයේදී අමෙරිකානු සබ්මැරීනයකින් එල්ල වූ ටෝර්පිඩෝ ප්‍රහාරයකින් ‘IRIS Dena’ නෞකාව ගිලී ගිය අතර, එහි සිටි නාවිකයන් 80කට අධික පිරිසක් මිය ගියහ. ඉන්දීය නාවික හමුදාවේ ආරාධනයකට අනුව විශේෂ නාවික අභ්‍යාසයකට සහභාගී වී යළි ඉරානය බලා යමින් සිටියදී මෙම නෞකාව ප්‍රහාරයට ලක් විය. ඉරානය පවසන්නේ තම නෞකාව කිසිදු අවියක් නොමැතිව ගමන් කරමින් සිටියදී අමෙරිකාව මෙම ප්‍රහාරය එල්ල කළ බවයි.