ඉරාන ඉස්ලාමීය විප්ලවීය ආරක්ෂක බලකායේ (IRGC) නාවික හමුදා ප්‍රධානී අලිරේසා තංසීරි (Alireza Tangsiri) ඊශ්‍රායල ප්‍රහාරයකින් ජීවිතක්ෂයට පත්ව ඇති බව විදෙස් මාධ්‍ය වාර්තා කරයි. ඉරානයේ බන්ඩර් අබ්බාස් (Bandar Abbas) ප්‍රදේශය ඉලක්ක කර ගනිමින් එල්ල වූ මෙම ප්‍රහාරයෙන් තංසීරි මහතා සමඟ තවත් ජ්‍යෙෂ්ඨ නාවික හමුදා නිලධාරීන් පිරිසක් ද මියගොස් ඇති බව ඊශ්‍රායල ආරක්ෂක අමාත්‍යවරයා තහවුරු කර තිබේ.

ලෝක බලශක්ති සැපයුමට තීරණාත්මක බලපෑමක් එල්ල කළ හෝමුස් සමුද්‍ර සන්ධිය වසා දැමීමේ මූලික සැලසුම්කරු අලිරේසා තංසීරි බවට ඊශ්‍රායලය මීට පෙර චෝදනා කර තිබුණි. මෙම ප්‍රහාරය ඉරානයේ නාවික බලයට එල්ල වූ දැවැන්ත පහරක් ලෙස දේශපාලන විචාරකයෝ හඳුන්වති.

2010 වසරේ සිට නියෝජ්‍ය නාවික හමුදා ප්‍රධානියා ලෙස කටයුතු කළ තංසීරි මහතා, 2018 වසරේදී ඉරාන ඉස්ලාමීය විප්ලවීය ආරක්ෂක බලකායේ නාවික හමුදා ප්‍රධානියා ලෙස උසස්වීම් ලැබීය. එතැන් සිට ඔහු ඉරාන මුහුදු සීමාවේ ආරක්ෂාව සහ මෙහෙයුම් සම්බන්ධයෙන් ප්‍රධාන භූමිකාවක් ඉටු කළේය.

කෙසේ වෙතත්, තම නාවික හමුදාපතිවරයාගේ මරණය සම්බන්ධයෙන් ඉරාන රජය හෝ IRGC බලකාය මෙතෙක් නිල ප්‍රකාශයක් නිකුත් කර නොමැත. සාමාන්‍යයෙන් මෙවැනි ජ්‍යෙෂ්ඨ නිලධාරීන්ගේ මරණ පිළිබඳව තොරතුරු තහවුරු කිරීමට ඉරානය යම් කාලයක් ගන්නා බව විදෙස් වාර්තා වැඩිදුරටත් සඳහන් කරයි.