වීරවංශ මහතා සඳහන් කළේ, මෙම ලැයිස්තුව ජනාධිපති ලේකම් කාර්යාලය විසින් සකස් කර ඇති අතර, මේ වන විටත් අදාළ ආයතන වෙත යොමු කර ඇති බවයි. ඔහු වැඩිදුරටත් කියා සිටියේ, මෙම ක්‍රියාවලියට සම්බන්ධ ආයතනයක අධ්‍යක්ෂ ජනරාල්වරයෙකු නිතර ජනාධිපති ලේකම් කාර්යාලය වෙත ගොස් උපදෙස් ලබාගන්නා බවයි. ඉදිරියේදී මේ පිළිබඳව සියලු තොරතුරු සමඟ තවත් අනාවරණයක් කිරීමට තමන් සූදානම් බවද ඔහු අවධාරණය කළා.
මෙම ලැයිස්තුවට හිටපු අමාත්‍යවරුන් වන කංචන විජේසේකර සහ වෛද්‍ය රමේෂ් පතිරණ ඇතුළු නම් 40ක් ඇතුළත් බවයි වීරවංශ මහතා පැවසුවේ.
පළාත් පාලන මැතිවරණයේදී ආණ්ඩුවේ ඡන්ද ප්‍රතිශතය අඩුවීමට ප්‍රධාන හේතුවක් වූයේ දූෂිතයන්ට එරෙහිව ක්‍රියාමාර්ග නොගැනීම බවට ආණ්ඩුව තුළ විශ්වාසයක් පවතින බවත්, එම විශ්වාසය මත මෙම ලැයිස්තුව සකස් කර ඇති බවත් විමල් වීරවංශ මහතා වැඩිදුරටත් ප්‍රකාශ කර සිටියා.
විමල් වීරවංශ මහතා මෙම ප්‍රකාශය සිදුකරේ ඊයේ (27) පැවිති හිරු රූපවාහිනී වැඩසටහනකට එක්වෙමින්.
මෙම හෙළිදරව්ව දේශපාලන ක්ෂේත්‍රයේ විශාල කතාබහකට ලක්ව ඇති අතර, ඉදිරියේදී සිදුවන දේ පිළිබඳව බොහෝ දෙනෙකුගේ අවධානය යොමුව තිබෙනවා.
