අමෙරිකාවේ වොෂින්ටන් නුවර යුදෙව් කෞතුකාගාරය ඉදිරිපිටදී ඊයේ (මැයි 21) දහවල් 12:45 ට පමණ සිදු වූ වෙඩි තැබීමකින් ඊශ්‍රායල තානාපති කාර්යාලයේ සේවය කළ තරුණ යුවළක් ඝාතනයට ලක්ව තිබේ. 26 හැවිරිදි සාරා ලින් මිල්ග්‍රිම් සහ 30 හැවිරිදි යාරොන් ලිස්චින්ස්කි මෙලෙස අවාසනාවන්ත ලෙස මියගොස් ඇත.
වොෂින්ටන්හි ඊශ්‍රායල තානාපති යෙචියෙල් ලයිටර් විදෙස් මාධ්‍ය වෙත අදහස් දක්වමින් කියා සිටියේ, මෙම යුවළ විවාහ ගිවිස ගැනීමට ආසන්නව සිටි බවයි. ලිස්චින්ස්කි ලබන සතියේ ජෙරුසලමේදී තම පෙම්වතියට විවාහ යෝජනාවක් කිරීමේ අදහසින් මේ සතියේ මුද්දක් මිලදී ගෙන තිබූ බවද තානාපතිවරයා වැඩිදුරටත් අනාවරණය කළේය.
යාරොන් ලිස්චින්ස්කි 2022 සැප්තැම්බර් මාසයේ සිට වොෂින්ටනයේ සේවය කරමින් සිටි අයෙකි. ඔහු ජර්මනියේ උපත ලබා වයස අවුරුදු 16දී ඊශ්‍රායලයට සංක්‍රමණය වී ඇත. ජෙරුසලමේ හෙබ්‍රෙව් විශ්වවිද්‍යාලයෙන් ජාත්‍යන්තර සබඳතා පිළිබඳ උපාධියක් සහ රීච්මන් විශ්වවිද්‍යාලයෙන් රාජ්‍ය තාන්ත්‍රිකභාවය සහ උපායමාර්ග පිළිබඳ ශාස්ත්‍රපති උපාධියක් ඔහු සතු විය.
සාරා ලින් මිල්ග්‍රිම් ද අමෙරිකාවේ විශ්වවිද්‍යාලයකින් ජාත්‍යන්තර සබඳතා පිළිබඳ පශ්චාත් උපාධි දෙකක් ලබා ඇති අතර, එක්සත් ජාතීන්ගේ සංවිධානය විසින් පවත්වාගෙන යනු ලබන සාම විශ්වවිද්‍යාලයෙන් ස්වාභාවික සම්පත් සහ තිරසාර සංවර්ධනය පිළිබඳ පශ්චාත් උපාධි දෙකක් ද ඇය සතු විය.
වෙඩි තැබීම සම්බන්ධයෙන් 30 හැවිරිදි එලියාස් රොඩ්‍රිගස් නමැති චිකාගෝ හි පදිංචිකරුවෙකු අත්අඩංගුවට ගෙන තිබේ. වොෂින්ටන් පොලීසිය පවසන පරිදි, ප්‍රහාරයෙන් පසු ඔහු “නිදහස් පලස්තීනය” යනුවෙන් කෑ ගසා ඇත.
මෙම සිද්ධියෙන් පසු ලොව පුරා ඊශ්‍රායල තානාපති කාර්යාලවල ආරක්ෂාව තර කිරීමට ඊශ්‍රායල අගමැති බෙන්ජමින් නෙතන්යාහු කටයුතු යොදා ඇති බව වාර්තා වේ. මෙම ප්‍රහාරය ඊශ්‍රායල-පලස්තීන ගැටුමේ ආතතිය තවදුරටත් ඉහළ නංවන සිදුවීමක් ලෙස සැලකේ.
