ශ්රී ලංකාව ඇතුළු ලොව පුරා රටවල් 60කින් තමන් වෙත ආනයනය කරනු ලබන භාණ්ඩ සඳහා 10% සිට 12.5% දක්වා ඉහළ අතිරේක ආනයන බද්දක් (Additional Import Tariffs) පැනවීමට ඇමෙරිකානු එක්සත් ජනපද පරිපාලනය නව යෝජනාවක් ඉදිරිපත් කර තිබේ.
නිෂ්පාදන ක්රියාවලීන්හිදී බලහත්කාර ශ්රමය (Forced Labor) භාවිතය වැළැක්වීම සඳහා අදාළ රටවල් ප්රමාණවත් පියවර නොගැනීම සහ එමඟින් ඇමෙරිකානු දේශීය වෙළෙඳපොළට අසාධාරණ බලපෑම් එල්ල වීම මෙම තීරණයට හේතුවී ඇති බව විදෙස් මාධ්ය වාර්තා කරයි.
ඇමෙරිකානු වෙළෙඳ බලධාරීන්ගේ සැලසුමට අනුව මෙම බදු පැනවීම කාණ්ඩ දෙකක් යටතේ සිදු කිරීමට යෝජිතය.
10%ක අතිරේක බද්ද: කැනඩාව, මෙක්සිකෝව, පකිස්තානය, බංග්ලාදේශය සහ මැලේසියාව ඇතුළු රටවල් කිහිපයකට මෙම බදු ප්රතිශතය පැනවීමට යෝජනා කර ඇත.
12.5%ක අතිරේක බද්ද: ශ්රී ලංකාව ඇතුළු තවත් රටවල් 45ක් සඳහා මෙම ඉහළම බදු ප්රතිශතය පැනවීමට පියවර ගෙන තිබේ.
ඇමෙරිකානු වෙළෙඳ නියෝජිත කාර්යාලය (USTR) පෙන්වා දෙන්නේ, බලහත්කාර ශ්රමය යොදවා සිදුකරන නිෂ්පාදන දේශීය වෙළෙඳපොළට ඇතුළු වීම තහනම් කිරීමට සහ ඊට අදාළ නීති ඵලදායී ලෙස ක්රියාත්මක කිරීමට ශ්රී ලංකාව අපොහොසත් වී ඇති බව විශේෂ විමර්ශනයකදී හෙළි වී ඇති බවයි.
ඇමෙරිකාවට භාණ්ඩ අපනයනය කිරීමෙන් මෙරටට වැඩිම විදේශ විනිමය ප්රමාණයක් උපයා දෙන ශ්රී ලංකාවේ ඇඟලුම් සහ රෙදිපිළි (Apparel and Textiles) ක්ෂේත්රය කෙරෙහි මෙමඟින් දැඩි බලපෑමක් එල්ල වීමේ අවදානමක් මතුව ඇත.
කෙසේ වෙතත්, මෙම දැඩි බදු ප්රතිපත්තිය මධ්යයේ වුවද, ඇතැම් ඇඟලුම් නිෂ්පාදන සඳහා අඩු බදු අනුපාත යටතේ ඇමෙරිකානු වෙළෙඳපොළට ඇතුළු වීමට ඉඩ සලසන විශේෂ කෝටා යාන්ත්රණයක් (Quota System) ද යෝජනා වී තිබේ. නමුත් ඒ පිළිබඳ නිල හෝ සවිස්තරාත්මක තොරතුරු මෙතෙක් ප්රකාශයට පත් කර නොමැත.
මෙම නව බදු යෝජනාවලිය මෙතෙක් ස්ථිර කර නොමැති අතර, ඒ සම්බන්ධයෙන් වන මහජන සහ ව්යාපාරික අංශවල අදහස් හා යෝජනා ලබා ගැනීම එළඹෙන ජූලි මස 06 වැනිදා දක්වා සිදු කිරීමට නියමිතය.
අනතුරුව ජූලි මස 07 වැනිදා ඒ පිළිබඳ විශේෂ මහජන විභාගයක් (Public Hearing) පැවැත්වීමට ඇමෙරිකානු පරිපාලනය තීරණය කර ඇති අතර, ඉන් පසුව මෙම බදු සංශෝධන නිල වශයෙන් බලාත්මක කිරීමට නියමිත බව වාර්තා වේ.
