ඓතිහාසික කන්ද උඩරට ඇසළ පෙරහැර මහා මංගල්‍යයේ අවසන් රන්දෝලි පෙරහැර අද (08) රාත්‍රියේ වීථි සංචාරය කිරීමට නියමිතයි.
දියවඩන නිලමේ ප්‍රදීප් නිලංග දැල මහතා පැවසුවේ, පසුගිය ජූලි 30 වැනිදා ආරම්භ වූ ඇසළ පෙරහැර මංගල්‍යය දින 9ක් වීථි සංචාරය කිරීමෙන් අනතුරුව එහි අවසන් රන්දෝලි පෙරහැර අද පස්වරුවේ වීථි සංචාරය කරන බවයි.
අවසන් රන්දෝලි පෙරහැර නැරඹීම සඳහා දෙස් විදෙස් සංචාරකයින් මෙන්ම බෞද්ධ බැතිමතුන් රැසක් මේ වනවිටත් මහනුවර නගරයට පැමිණෙමින් සිටිනවා. ඔවුන් සඳහා අවශ්‍ය පහසුකම් සලසා ඇති බව අප වාර්තාකරුවන් සඳහන් කළා.
අවසන් රන්දෝලි පෙරහැර වෙනුවෙන්ද මහනුවර නගරය කේන්ද්‍ර කර ගනිමින් විශේෂ ආරක්ෂක සහ රථවාහන සැලැස්මක් ක්‍රියාත්මක බව පොලීසිය ප්‍රකාශ කළා.
එමෙන්ම, පෙරහැර මංගල්‍යය සඳහා සහභාගී වන බැතිමතුන්ගේ පහසුව වෙනුවෙන් අද දිනයේ ද විශේෂ දුම්රිය කිහිපයක් ධාවනයට එක්කර ඇති බව දුම්රිය සාමාන්‍යාධිකාරී ධම්මික ජයසුන්දර මහතා පැවසුවා.
