දකුණු කොරියාවේ රැකියාවක නිරතව සිටි ශ්‍රී ලාංකික සේවකයෙකුට මුහුණදීමට සිදු වූ බරපතල අපයෝජන සිද්ධියක් සම්බන්ධයෙන් එරට ජනාධිපති ලී ජේ මියුන්ග් දැඩි ලෙස හෙළාදකිමින් ප්‍රකාශ කර ඇත්තේ, “ඕනෑම මානව හිමිකම් උල්ලංඝනයකට දැඩි ලෙස ප්‍රතිචාර දක්වන” බවයි.
මෙම අවාසනාවන්ත සිදුවීම පසුගිය පෙබරවාරි 26 වැනි දින දකුණු ජෙයෝල්ලා හි නාජු හි පිහිටි ගඩොල් කර්මාන්ත ශාලාවකදී වාර්තා වී ඇත. වාර්තා වන අන්දමට, කර්මාන්ත ශාලාවේ අනෙකුත් සේවකයින් විසින් මෙම ශ්‍රී ලාංකික සේවකයා ගඩොල් ගොඩක බැඳ, ෆෝක්ලිෆ්ට් යන්ත්‍රයකින් ඉහළට ඔසවා හිරිහැර කරමින් සමච්චලයට ලක් කර තිබෙනවා.
මෙම සේවකයා 2024 දෙසැම්බර් මාසයේදී රැකියා බලපත්‍ර ක්‍රමය යටතේ E-9 වීසා බලපත්‍රයක් මත කොරියාවට ගොස් ඇති අතර, සිද්ධිය සිදුවීමට පෙර ඔහු මාස තුනක් පමණ එම කර්මාන්ත ශාලාවේ සේවය කර ඇත. “රැකියාවේ වරදක් සිදුකළ බව පවසමින්” අනෙකුත් සේවකයින් මෙම අපයෝජනය සිදු කර ඇති බව ජියෝනාම් සංක්‍රමණික කම්කරු මානව හිමිකම් ජාලය පවසා තිබෙනවා.
සිද්ධියෙන් මාස කිහිපයකට පසු, මෙම අපයෝජනයට අදාළ වීඩියෝවක් පසුගිය දා සමාජ මාධ්‍ය ඔස්සේ සංසරණය වීමත් සමඟ කොරියානු රජය මේ පිළිබඳව පරීක්ෂණයක් ආරම්භ කර ඇත. මෙම සිද්ධියත් සමඟ තමන් දැඩි මානසික පීඩාවකට පත්ව සිටින බව එම ශ්‍රී ලාංකික සේවකයා එරට මාධ්‍ය වෙත අදහස් දක්වමින් ප්‍රකාශ කර තිබෙනවා.
දකුණු කොරියානු ජනාධිපති ලී ජේ මියුන්ග් මෙම සිදුවීම සම්බන්ධයෙන් දැක්වූ ප්‍රතිචාරය මෙසේය:
“මට මගේ ඇස් අදහා ගත නොහැකි වුණා. ප්‍රජාතන්ත්‍රවාදී රටක සහ සංස්කෘතික බලවතෙකු තුළ මෙවැනි අපයෝජනයක් සිදුවිය හැකි යැයි මම කිසි විටෙකත් සිතුවේ නැහැ. මෙය සමාව දිය නොහැකි ප්‍රචණ්ඩ ක්‍රියාවක්. සුළුතරයකට සහ අවදානමට ලක්විය හැකි පුද්ගලයෙකුට එරෙහිව මානව හිමිකම් පැහැදිලිවම උල්ලංඝනය කිරීමක්. කිසිවෙකු සංක්‍රමණික සේවකයෙකුගේ අවදානමට ලක්විය හැකි තත්ත්වය සූරාකෑමට හෝ අපයෝජනය කිරීමට අපයෝජනය නොකරන බවට අපි සහතික වෙනවා. විදේශයන්හි සේවය කරන කොරියානු පුරවැසියන් අපි අගය කරනවා සේම, සංක්‍රමණික සේවකයින්ගේ මූලික අයිතිවාසිකම් ආරක්ෂා කරනවා.”
