සංවිධානාත්මක අපරාධ කල්ලි නායකයෙකු වූ ගණේමුල්ල සංජීව අලුත්කඩේ මහේස්ත්‍රාත් අධිකරණයේදී ඝාතනය කිරීමට ආධාර අනුබල දුන් බවට නම සඳහන් වූ ඉෂාරා සෙව්වන්දි නැමැති කාන්තාව එම සිදුවීමෙන් පසු රටින් පලාගොස් ඇති බවට තොරතුරු අනාවරණය වී තිබෙනවා.
අපරාධ පරීක්ෂණ දෙපාර්තමේන්තුවට මෙම තොරතුරු අනාවරණය වී ඇත්තේ, පසුගියදා ඉන්දුනීසියාවේ ජකර්තා නුවරදී අත්අඩංගුවට ගෙන මෙරටට රැගෙන ආ කෙහෙල්බද්දර පද්මේ ඇතුළු අපරාධකරුවන් පිරිසගෙන් සිදුකළ ප්‍රශ්න කිරීම්වලදීයි.
ශ්‍රී ලංකා පොලීසිය, ඉන්දුනීසියානු පොලීසිය සහ ජාත්‍යන්තර පොලීසිය ඒකාබද්ධව සිදුකළ මෙහෙයුමකින් අත්අඩංගුවට ගත් කෙහෙල්බද්දර පද්මේ, කමාන්ඩෝ සලින්ත, බැකෝ සමන් ඇතුළු පිරිසක් මේ වනවිට රැඳවුම් නියෝග මත ප්‍රශ්න කරමින් සිටී. මෙම පිරිස අතරින් කෙහෙල්බද්දර පද්මේ, පානදුර නිලංග සහ කමාන්ඩෝ සලින්ත අපරාධ පරීක්ෂණ දෙපාර්තමේන්තුව භාරයේ සිටින අතර, තැඹිලි ළහිරු සහ බැකෝ සමන් බස්නාහිර උතුර අපරාධ කොට්ඨාසය භාරයේ සිටිනවා.
මෙම සැකකරුවන් අත්අඩංගුවට ගන්නා අවස්ථාවේදී ඔවුන් සතුව තිබූ ජංගම දුරකථන 28ක්ද ඉන්දුනීසියානු පොලීසිය භාරයට ගෙන ඇති අතර, එම දුරකථන මේ වනවිට ශ්‍රී ලංකා පොලීසිය වෙත භාර දී තිබෙනවා. ඒවා භාවිතයෙන් ලබාගත් දුරකථන ඇමතුම් පිළිබඳව මේ වනවිට විමර්ශන කටයුතු ආරම්භ කර ඇති බවද වාර්තා වේ.
ගණේමුල්ල සංජීව ඝාතනයට අදාළව තවදුරටත් තොරතුරු අනාවරණය වනු ඇතැයි අපේක්ෂා කෙරේ.
