වැලිගම සභාපති ඝාතනය: බූස්ස බන්ධනාගාරයේ සිටි ‘මිදිගම රුවන්’ ගැන සැකයක්!
වැලිගම සභාපතිවරයාගේ ඝාතනය සම්බන්ධයෙන් විමර්ශන කණ්ඩායම්වල අවධානය යොමුව ඇත්තේ බූස්ස බන්ධනාගාරයේ රඳවා සිටින සංවිධානාත්මක අපරාධකරුවෙකු වන ‘මිදිගම රුවන්’ වෙතය. මෙම ඝාතනය ඔහුගේ මෙහෙයවීමෙන් සිදුවූවක්දැයි පොලිසිය සැක පළ කරයි.
විමර්ශකයන් සැකකරන්නේ පසුගියදා සොයාගත් ගිනි අවි 04ක් සහ මිදිගම රුවන්ට හිතවත් පිරිසකට කළ පහරදීමක් මෙම ඝාතනයට ආසන්නතම හේතු වන්නට ඇති බවයි.
- ගිනි අවි සොයාගැනීම: සැප්තැම්බර් 24 වනදා වැලිගමදී පොලිස් විශේෂ කාර්ය බලකාය (STF) විසින් සොයා ගත් T56 ගිනි අවි 04ක් මිදිගම රුවන්ට අයත් බවට හෙළි වී තිබුණි. මෙම අවි සොයා ගත්තේ රුවන්ගේ ඥාතියකුගේ නිවසකිනි.
- ඔත්තුව ගැන සැකය: ගිනි අවි සොයා ගැනීමට ඔත්තුව දී ඇත්තේ සභාපතිවරයා විසින් බවට රුවන් සැකකර ඇති අතර, මේ සම්බන්ධයෙන් සභාපතිවරයාට තර්ජනයක්ද එල්ල වී තිබේ.
- පහරදීම: මෑතකදී සභාපතිවරයා විසින් රුවන්ගේ ආශිර්වාදය ලබන දිය මත ලිස්සන ක්‍රීඩාවේ නිරත වැලිගම තරුණයින් පිරිසකට පහරදීමක් ද කර ඇති බව වාර්තා වේ.
‘මිදිගම රුවන්’ යනු ‘හරක් කටා’ගේ ප්‍රධාන ගෝලයෙකි. සභාපතිවරයාද මීට පෙර ‘හරක් කටා’ගේ කල්ලියේ සමීපතමයෙකු විය.
- ‘හරක් කටා’ මැඩගස්කරයේදී අත්අඩංගුවට ගෙන මෙරටට රැගෙන ඒමෙන් පසු සභාපතිවරයා එම කල්ලියෙන් ඈත්වී තිබේ.
- රුවන් ඩුබායිහි සිටියදී, ‘හරක් කටා’ අපරාධ පරීක්ෂණ දෙපාර්තමේන්තුවෙන් පැන්නීමට පවා සැලසුම් කර ඇත.
- ඩුබායි පොලීසිය විසින් අත්අඩංගුවට ගත් රුවන් පසුගිය වසරේ මැයි 30 වනදා මෙරටට පිටුවහල් කර දැනට බූස්ස බන්ධනාගාරයේ රඳවා සිටී.
මෑතකදී STF විසින් බන්ධනාගාරය තුළ කළ මෙහෙයු‍මේදී වැඩිම දුරකථන ප්‍රමාණයක් සොයා ගත්තේ ද රුවන් රැඳී සිටි වාට්ටුවෙන් වීම ඔහුගේ ක්‍රියාකාරීත්වය තහවුරු කරයි.
මිදිගම රුවන්ගේ මෙහෙයවීම පිළිබඳ මෙම සැකයන් තහවුරුකර ගැනීමට මේ වන විටත් පොලීසිය විමර්ශන පවත්වයි.
මෙම ඝාතනයත් සමග, මෑත කාලය තුළ දකුණු පළාතේ පළාත්පාලන ආයතන තුනක සභාපතිවරුන් තිදෙනෙකු ඝාතනයට ලක්වීම විශේෂත්වයකි.
- 2003: හික්කඩුව නගර සභා‍වේ සභාපති ගාමිණි පින්නදූව ඝාතනය.
- 2015: හික්කඩුව ප්‍රාදේශීය සභා‍වේ සභාපති මනෝජ් මෙන්ඩිස් ඝාතනය.
90 දශකයේ සිට මේ දක්වා පළාත්පාලන ආයතන සභාපතිවරුන් මෙන්ම මන්ත්‍රීවරුන් 20කට වැඩි පිරිසක් මෙලෙස ඝාතනය වී ඇති අතර, මෙම ඝාතන බොහොමයක්ම පාතාලයේ ගැටුම් නිසා සිදුවූ ඒවා බවට හඳුනාගෙන තිබේ. වැඩිම ඝාතන ගණනක් වාර්තා වන්නේ බස්නාහිර සහ දකුණු පළාත් තුළින්ය.
