ගාසා තීරයේ ගැටුම් අවසන් කර මැද පෙරදිග සාමය ඇති කර ගැනීම සඳහා හමාස් සංවිධානය සමඟ පවත්වන සාකච්ඡා ඉතා ධනාත්මක බව අමෙරිකානු ජනාධිපති ඩොනල්ඩ් ට්‍රම්ප් පවසයි.
කෙසේ වෙතත්, කාලය අත්‍යාවශ්‍ය සාධකයක් බව පෙන්වා දෙන ට්‍රම්ප්, සාකච්ඡාවල පළමු අදියර මෙම සතිය තුළ අවසන් කළ යුතු බවට අවධාරණය කරයි. එසේ නොවුණහොත්, “කිසිවකුට දැකීමට අවශ්‍ය නොවන මහත් ලේ වැගිරීමක්” සිදුවිය හැකි බවට හෙතෙම අනතුරු අඟවයි.
ට්‍රම්ප්ගේ කාරණා 20 කින් යුත් සටන් විරාම සැලැස්ම පදනම් කරගනිමින් ගිවිසුමක් අවසන් කර ගැනීමේ අරමුණින් හමාස්, ඊශ්‍රායලය සහ අමෙරිකාව යන රටවල නියෝජිත පිරිස් හෙට (සඳුදා) සිට ඊජිප්තුවේ ෂාම් එල් ෂෙයික්හිදී සාකච්ඡා පැවැත්වීමට නියමිතය. මෙම සාකච්ඡා වේගයෙන් ඉදිරියට යන බවත්, ඒවා ඉතා සාර්ථක බවත් ට්‍රම්ප් සඳහන් කරයි.
ජනාධිපතිවරයා අපේක්ෂා කරන්නේ මෙම සාකච්ඡා දින කිහිපයක් පමණක් ගතවනු ඇති බවයි. ඔහු අවධාරණය කරන්නේ සාකච්ඡාවල ප්‍රධාන අරමුණු වන්නේ ප්‍රාණ ඇපකරුවන් නිදහස් කිරීම, ගාසා යුද්ධය අවසන් කිරීම සහ මැද පෙරදිග දිගුකාලීන සාමය ඇති කර ගැනීම බවයි.
ට්‍රම්ප් ඉල්ලා සිටින්නේ සෑම කෙනෙකුම වේගයෙන් කටයුතු කරන ලෙසයි. එමෙන්ම ඔහු ගාසා තීරයට බෝම්බ හෙලීම තාවකාලිකව නවත්වන ලෙස ඊශ්‍රායලයෙන් ඉල්ලා තිබුණද, පසුගිය සති අන්තයේ ඊශ්‍රායල ප්‍රහාර හේතුවෙන් 10 දෙනෙකුට වැඩි පිරිසක් මිය ගොස් තිබේ. ට්‍රම්ප් මෙම යෝජනාව සමඟ ඉදිරියට යන ලෙස ඊශ්‍රායලයට බලපෑම් කරමින් සිටී.
අනෙක් අතට, හමාස් සංවිධානය ගාසා තීරයේ බලය අත්හැරීම ප්‍රතික්ෂේප කළහොත් “සම්පූර්ණයෙන්ම විනාශ වී යනු ඇතැයි” ඔහු ප්‍රකාශ කර තිබේ.
මේ අතර, හමාස් නිලධාරීන් පවසා ඇත්තේ මියගිය ප්‍රාණ ඇපකරුවන්ගේ සිරුරු එකතු කිරීම ආරම්භ කර ඇති බවත්, ජීවත්ව සිටින ප්‍රාණ ඇපකරුවන් මුදා හැරීම එක් අදියරකින් සිදුවනු ඇති බවත්ය. ඔවුන් කියා සිටින්නේ මෙම කාර්යය සඳහා ගුවන් ප්‍රහාර නතර කරන ලෙස ඊශ්‍රායලයෙන් ඉල්ලා ඇති බවයි. පලස්තීනුවන් බිම් මට්ටමේ පවතින විනාශය මධ්‍යයේ සටන් විරාමයක් පිළිබඳව සුභවාදීව බලා සිටිති.
ට්‍රම්ප් අවධාරණය කරන්නේ තමන් මෙම සියවස් ගණනාවක් පැරණි ගැටුම දිගටම අධීක්ෂණය කරන බවයි.
