පාස්කු උත්සව සමයේ ආරක්ෂාව තර කිරීමට විශේෂ වැඩපිළිවෙළක් ක්‍රියාත්මක කරන බව පොලිස් මූලස්ථානය නිවේදනය කරයි.
කිතුනු බැතිමතුන්ගේ පාස්කු උත්සවයේ දේව මෙහෙයන් 2025 අප්‍රේල් 18 සහ 20 යන දිනවල පැවැත්වෙන බැවින් එම දිනවල බැතිමතුන්ගේ ආරක්ෂාව වෙනුවෙන් විශේෂ පොලිස් ආරක්ෂාවක් යෙදවීමට නියමිතය.
ඒ සම්බන්ධයෙන් වැඩබලන පොලිස්පති නීතිඥ ප්‍රියන්ත වීරසූරිය මහතා විසින් සියලුම පළාත් භාර ජ්‍යෙෂ්ඨ නියෝජ්‍ය පොලිස්පතිවරුන්, කොට්ඨාස භාර නිලධාරීන් ඇතුළු සියලුම පොලිස් ස්ථානාධිපතිවරුන්ට උපදෙස් ලබා දී ඇත.
බැතිමතුන් වැඩි වශයෙන් පැමිණිය හැකි දේවස්ථාන හඳුනාගෙන එම ස්ථානවල සහ ඒ අවට ආරක්ෂාව තහවුරු කිරීමත් ප්‍රධාන දේව මෙහෙයන් පැවැත්වෙන දේවස්ථාන සඳහා විශේෂ අවධානයක් යොමු කර ආරක්ෂක පියවර ගන්නා ලෙසත් වැඩබලන පොලිස්පතිවරයා වැඩිදුරටත් උපදෙස් ලබා දී ඇති අතර මේ සඳහා පොලිස් නිලධාරීන්, විශේෂ කාර්ය බළකාය සහ ත්‍රිවිධ හමුදා නිලධාරීන් රාජකාරියේ යෙදවීමට තීරණය කර තිබේ.
