දූෂණ චෝදනා මත වරදකරුවන් වී සිරදඬුවම් නියම වී සිටින හිටපු අමාත්යවරුන් වන මහින්දානන්ද අලුත්ගමගේ සහ නලින් ප්රනාන්දු යන මහත්වරුන් විසින් ඉදිරිපත් කළ අභියාචනා පෙත්සම් විභාග කිරීම අද (09) ශ්රේෂ්ඨාධිකරණය හමුවේ ආරම්භ විය. අගවිනිසුරු ප්රීති පද්මන් සූරසේන මහතාගේ ප්රධානත්වයෙන් යුත් පංච පුද්ගල ශ්රේෂ්ඨාධිකරණ විනිසුරු මඩුල්ලක් ඉදිරියේ මෙම විභාගය පැවැත්වේ.
මෙම විනිසුරු මඩුල්ලේ සෙසු සාමාජිකයන් ලෙස ශ්රේෂ්ඨාධිකරණ විනිසුරුවරුන් වන ශිරාන් ගුණරත්න, අර්ජුන ඔබේසේකර, අචල වෙංගප්පුලි සහ සම්පත් අබේකෝන් යන මහත්වරු කටයුතු කරති.
පසුගිය යහපාලන රජය සමයේ ගොනු කළ මෙම නඩුවට පදනම් වී ඇත්තේ 2015 ජනාධිපතිවරණ සමයේ සිදුවූ මූල්ය වංචාවකි. එවකට ජනාධිපති අපේක්ෂක මහින්ද රාජපක්ෂ මහතාගේ දේශපාලන කටයුතු සඳහා සතොස ආයතනය හරහා කැරම් බෝඩ් 14,000ක් සහ දාම් ලෑලි 11,000ක් ආනයනය කර බෙදාහැරීම තුළින් රජයට රුපියල් කෝටි 6කට ආසන්න පාඩුවක් සිදුකළ බවට මොවුන්ට චෝදනා එල්ල විය.
මෙම චෝදනාවලට වරදකරුවන් කරමින් කොළඹ ස්ථිර ත්රිපුද්ගල මහාධිකරණය විසින් මහින්දානන්ද අලුත්ගමගේ මහතාට වසර 20ක බරපතළ වැඩ සහිත සිරදඬුවමක් සහ නලින් ප්රනාන්දු මහතාට වසර 25ක බරපතළ වැඩ සහිත සිරදඬුවමක් නියම කර තිබුණි. තමන්ව එම දඬුවම්වලින් නිදොස් කොට නිදහස් කරන ලෙස ඉල්ලා හිටපු අමාත්යවරුන් දෙදෙනා මෙම අභියාචනය ඉදිරිපත් කර ඇත.
