මාදම්පේ, කරුකුවටව ප්රදේශයේ පවත්වාගෙන යනු ලබන වෙළෙඳසැලක් තුළදී වයස අවුරුදු 05ක් වන පෙර පාසල් වයසේ පසුවන කුඩා දැරියකට බරපතල ලෙස ලිංගික අතවර කළ බව කියන 65 හැවිරිදි ව්යාපාරිකයෙකු වහාම ක්රියාත්මක වී අත්අඩංගුවට ගැනීමට මාදම්පේ පොලීසිය සමත්ව තිබේ.
සමාජයීය වශයෙන් දැඩි කතාබහට ලක්වූ මෙම නින්දිත සිදුවීම සම්බන්ධයෙන් දැරියගේ මව විසින් පොලිස් ස්ථානය වෙත පැමිණ කරන ලද පැමිණිල්ලකට අනුව සැකකරු මෙලෙස කොටු කරගෙන ඇත.
පොලිස් මූලික විමර්ශනවලට අනුව, අතවරයට පත් කුඩා දැරිය ඊයේ දින බිස්කට් වර්ගයක් මිලදී ගැනීම සඳහා සිය නිවස අසල පිහිටි, අදාළ සැකකරුට අයත් සිල්ලර වෙළෙඳසැල වෙත ගොස් තිබේ. එම අවස්ථාවේදී වෙළෙඳසැලේ වෙනත් පාරිභෝගිකයන් නොසිටීමෙන් ප්රයෝජන ගත් මෙම වයෝවෘද්ධ ව්යාපාරිකයා, දැරියව රහසිගත ලෙස වෙළෙඳසැල ඇතුළතට කැඳවාගෙන මෙම ලිංගික අතවරය සිදුකර ඇත.
නිවසට පැමිණි දැරිය පසුව මේ පිළිබඳව සිය මව වෙත පවසා ඇති අතර, තත්ත්වයේ බරපතලකම වටහාගත් මව වහාම මාදම්පේ පොලීසිය වෙත ගොස් සිද්ධිය පිළිබඳව පැමිණිලි කිරීමට පියවර ගෙන තිබේ.
ලිංගික අතවරයට ලක්වූ කුඩා දැරිය මේ වන විට විශේෂ වෛද්ය පරීක්ෂණයකට භාජනය කිරීම සඳහා හලාවත මහා රෝහලේ අධිකරණ වෛද්ය නිලධාරීවරයා (JMO) වෙත යොමු කර ඇති බව රෝහල් ආරංචි මාර්ග සඳහන් කරයි.
දැරියගෙන් සහ ඇයගේ මවගෙන් ප්රකාශ සටහන් කර ගැනීමෙන් අනතුරුව අත්අඩංගුවට ගත් 65 හැවිරිදි සැකකාර ව්යාපාරිකයා, ළමා අපචාර වැළැක්වීමේ දැඩි ප්රතිපාදන යටතේ හලාවත මහෙස්ත්රාත් අධිකරණය වෙත ඉදිරිපත් කිරීමට පොලීසිය සියලු කටයුතු සූදානම් කර ඇත. මාදම්පේ පොලිස් ස්ථානාධිපතිවරයාගේ සෘජු මෙහෙයවීමෙන් මේ පිළිබඳව වැඩිදුර විමර්ශන ක්රියාත්මකය.
