මැදපෙරදිග කලාපයේ උද්ගතව ඇති යුදමය තත්ත්වය හමුවේ මෙරට ආර්ථිකයට සහ බලශක්ති ක්ෂේත්රයට එල්ල විය හැකි දැඩි අභියෝග කළමනාකරණය කර ගැනීම සඳහා විශේෂ කමිටු තුනක් පත් කර ඇති බව අග්රාමාත්ය හරිනි අමරසූරිය මෙනවිය පවසයි. අද පාර්ලිමේන්තු සභාවාරය අමතමින් ඇය අවධාරණය කළේ, පැයෙන් පැය වෙනස් වන ගෝලීය දේශපාලනික වෙනස්කම් හමුවේ මෙරට ජන ජීවිතය සුරක්ෂිත කිරීමට රජය උපරිම පියවර ගනිමින් සිටින බවයි.
අග්රාමාත්යවරිය සඳහන් කළ පරිදි, ඊයේ පැවති කැබිනට් මණ්ඩල රැස්වීමේදී අනුමත වූ මෙම විශේෂ කමිටු ත්රිත්වය පහත ක්ෂේත්ර නියාමනය කිරීම සඳහා පත් කර ඇත,
අත්යවශ්ය භාණ්ඩ හා සේවා කමිටුව: වෙළඳපොළේ අත්යවශ්ය ආහාර ද්රව්ය සහ සේවාවන් හිඟයකින් තොරව පවත්වාගෙන යාම සහතික කිරීම සඳහා.
රාජ්ය සේවා කළමනාකරණ කමිටුව: ආර්ථික පීඩනය හමුවේ රාජ්ය සේවය බිඳවැටීමකින් තොරව පවත්වාගෙන යාම සඳහා අවශ්ය ක්රියාමාර්ග ගැනීම පිණිස.
බලශක්ති සුරක්ෂිතතා කමිටුව: රටේ බලශක්ති අවශ්යතාව සපුරා ගැනීමට සහ පවතින සංචිත විධිමත් ලෙස පරිහරණය කිරීම නිරීක්ෂණය කිරීමට.
“අපේ පාලනයෙන් පිටත සිදුවන මෙම ගෝලීය සිදුවීම් නිසා අපේ ආර්ථිකයට විශාල බලපෑමක් එල්ල වෙනවා. මෙම චලනයන් හඳුනාගෙන ඒවායේ බලපෑම කළමනාකරණය කිරීම රජය සතු විශාල වගකීමක්,” යැයි අග්රාමාත්යවරිය මෙහිදී වැඩිදුරටත් සඳහන් කළාය. විදේශීය බලපෑම් හමුවේ මෙරට බලශක්ති හා ආර්ථික ස්ථාවරත්වය රැක ගැනීමට මෙම කමිටු හරහා කඩිනම් උපායමාර්ගික තීන්දු ගන්නා බව ද ඇය සහතික කළාය.
