දිගු කලක් තිස්සේ පැවති මතභේදාත්මක තත්ත්වයට නිමාවක් තබමින්, මෙවර සිංහල සහ දමිළ අලුත් අවුරුද්ද වෙනුවෙන් සියලු පාර්ශ්වයන්ට එකඟ විය හැකි ‘ඒකාබද්ධ රාජ්ය නැකැත් සීට්ටුවක්’ ප්රකාශයට පත් කිරීමට තීරණය කර තිබේ. බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිඳුම සුනිල් සෙනවි මහතා අද (16) පැවති විශේෂ මාධ්ය හමුවකදී මේ බව අනාවරණය කළේය.
මෙම තීරණාත්මක එකඟතාවයට එළඹ ඇත්තේ ඈපා පංචාංග ලිත් කතෘ ඉන්දික ඈපා සෙනවිරත්න, තිරසර පංචාංග ලිත් කතෘ චමත් කොතලාවල සහ විකල්ප නැකත් ඉදිරිපත් කළ ජ්යොතිර්වේදීන් කණ්ඩායම අමාත්යවරයා සමඟ පැවැත්වූ විශේෂ සාකච්ඡාවකින් අනතුරුවය. ඒ අනුව, හෙට (17) දිනයේ මෙම ඒකාබද්ධ නැකැත් සීට්ටුව මුද්රණය කර නිල වශයෙන් ජනතාව වෙත නිකුත් කිරීමට රජය සැලසුම් කර ඇත.
පසුගිය 2024 වසරේදී එවකට පැවති පාලනය විසින් ‘රාජ්ය නැකැත් කමිටුව’ විසුරුවා හැරීමත් සමඟ මෙවර අවුරුදු නැකැත් සකස් කිරීම සම්බන්ධයෙන් විවිධ පාර්ශ්ව අතර දැඩි මත ගැටුම් නිර්මාණය වී තිබුණි. විශේෂයෙන්ම පෝය කමිටුව මගින් නැකැත් ඉදිරිපත් කිරීම පිළිබඳව ජ්යොතිර්වේදීන් සිය අප්රසාදය පළ කර සිටි අතර, විධිමත් රාජ්ය නැකැත් කමිටුවක් පත් කරන ලෙස රජයට බලපෑම් එල්ල විය.
එම ගැටලුකාරී වාතාවරණය හමුවේ, ‘සර්වජන බලය’ පක්ෂය මැදිහත් වී විද්වත් ජ්යොතිර්වේදීන් 17 දෙනෙකුගේ සහභාගීත්වයෙන් පොදු නැකැත් සීට්ටුවක් සකස් කිරීමට මූලික පියවර ගෙන තිබුණි. එම උත්සාහයන්ගේ සහ රජයේ මැදිහත්වීමේ ප්රතිඵලයක් ලෙස දැන් සියලු දෙනාටම එකඟ විය හැකි එක් අවුරුදු නැකැත් චාරිත්ර මාලාවක් මුළු රටටම ලැබීමට නියමිතය.
