ශ්‍රී ලංකාවේ පැවති එල්.ටී.ටී.ඊ ත්‍රස්තවාදය පරාජය කර අදට වසර 16ක් සපිරේ. 2009 මැයි 18 වන දින නන්දිකඩාල් කලපුවේදී එල්.ටී.ටී.ඊ නායක වේළුපිල්ලේ ප්‍රභාකරන් හමුදා භටයින් අතින් මිය යාමත් සමඟ දිගුකාලීන කුරිරු යුද්ධය අවසන් විය.

ලෝකයේ විශාලතම මානුෂීය මෙහෙයුම ලෙස සැලකෙන මෙහෙයුම මගින් ප්‍රාණ ඇපකරුවන් ලෙස රඳවාගෙන සිටි දහස් සංඛ්‍යාත සිවිල් වැසියන් එල්.ටී.ටී.ඊ ග්‍රහණයෙන් මුදා ගැනීමේ ගෞරවය ද ශ්‍රී ලංකා ආරක්ෂක හමුදාවට හිමි වේ.

මෙම යුද ජයග්‍රහණයට වසර 16ක් පිරීම නිමිත්තෙන් “ජාතික විජයග්‍රාහී සැමරුම් උත්සවය” හෙට (19) ශ්‍රී ජයවර්ධනපුර කෝට්ටේ පිහිටි රණවිරු ස්මාරකය අභියසදී පස්වරු 4 සිට 6 දක්වා පැවැත්වීමට නියමිතය.

නියෝජ්‍ය ආරක්ෂක අමාත්‍ය විශ්‍රාමික මේජර් ජනරාල් අරුණ ජයසේකර මහතාගේ ප්‍රධානත්වයෙන් පැවැත්වෙන මෙම ජාතික රණවිරු අනුස්මරණ උත්සවයට ත්‍රස්තවාදය පරාජය කිරීමට ත්‍රිවිධ හමුදාවට නායකත්වය දුන් ෆීල්ඩ් මාර්ෂල් සරත් ෆොන්සේකා, අද්මිරාල් ඔෆ් ද ෆ්ලීට් වසන්ත කරන්නාගොඩ සහ මාර්ෂල් ඔෆ් ද එයාර් ෆෝස් රොෂාන් ගුණතිලක යන මහත්වරුන් ද සහභාගී වීමට නියමිතය.