සෞදි අරාබියේ පැවති ආසියානු යොවුන් ශූරතා අවුරුදු 18න් පහළ මලල ක්‍රීඩා තරගාවලියේ කාන්තා මිශ්‍ර සහය දිවීමේ ඉසව්වෙන් ද ශ්‍රී ලංකාවට රිදී පදක්කමක් හිමි විය.

ශ්‍රී ලංකා ක්‍රීඩිකාවන් එම ඉසව්ව නිම කිරීම සඳහා විනාඩි 2.14.25ක කාලයක් ගත කළ අතර, එය නව ශ්‍රී ලංකා යොවුන් වාර්තාවක් ද විය.

රන් පදක්කම දිනාගත්තේ විනාඩි 2.11.11කින් තරගය නිම කළ චීනයයි.

ලෝකඩ පදක්කම හිමිවූයේ විනාඩි 2.15.00කින් ඉසව්ව අවසන් කළ තායිලන්තයටයි.

ආසියානු මලල ක්‍රීඩා සම්මේලනයේ සංවිධානයෙන් කටීෆ් හි දින හතරක් පැවති මෙම තරගාවලිය ඊයේ (18) අවසන් වූ අතර, එහිදී ශ්‍රී ලංකාව රන් පදක්කමක්, රිදී පදක්කම් 3ක් සහ ලෝකඩ පදක්කම් 4ක් දිනා ගනිමින් සමස්ත පදක්කම් 8ක් ලබා ගත්තේය.

ඒ අනුව, තරගාවලියට සහභාගී වූ රටවල් අතරින් අවම වශයෙන් ලෝකඩ පදක්කමක් හෝ දිනූ රටවල් 19 අතරින් ශ්‍රී ලංකාව පදක්කම් සටහනේ 9වන ස්ථානයට පත්විය.

මෙවර ශ්‍රී ලංකාව දිනාගත් පදක්කම් සංඛ්‍යාව ආසියානු වයස අවුරුදු 18න් පහළ ශූරතාවලියකදී මෙරට දිනාගත් වැඩිම පදක්කම් සංඛ්‍යාව ද වේ. අවසන් වරට 2023 වසරේ පැවති මෙම තරගාවලියේදී ශ්‍රී ලංකාවට හිමිවූයේ රිදී පදක්කම් 2ක් සහ ලෝකඩ පදක්කම් 2ක් පමණි.

රන් පදක්කම් 19ක්, රිදී පදක්කම් 12ක් සහ ලෝකඩ පදක්කම් 5ක් දිනාගත් චීනය පදක්කම් සටහනේ පළමු ස්ථානය දිනාගත් අතර, ජපානය රන් පදක්කම් 3ක්, රිදී පදක්කම් 3ක් සහ ලෝකඩ පදක්කමක් දිනා ගනිමින් දෙවන ස්ථානයට පත්විය.

සත්කාරක සෞදි අරාබිය රන් පදක්කම් 3ක්, රිදී පදක්කමක් සහ ලෝකඩ පදක්කම් 2ක් දිනා ගනිමින් තෙවන ස්ථානය හිමි කර ගත්තේය.